ബെംഗളൂരു: ബെംഗളൂരുവിലെ നമ്മ മെട്രോയുടെ പിങ്ക് ലൈനിന്റെ ആദ്യഘട്ടം സെപ്റ്റംബറിൽ യാത്രക്കാർക്കായി തുറന്നുകൊടുക്കാൻ സാധ്യത. കലേന അഗ്രഹാര മുതൽ തവരേക്കെരെ വരെയുള്ള 7.5 കിലോമീറ്റർ പാതയാണ് ആദ്യഘട്ടത്തിൽ സർവീസിന് സജ്ജമാകുന്നത്. കർണാടക സർക്കാർ കേന്ദ്രസർക്കാരിൽനിന്നുള്ള ഉദ്ഘാടന തീയതിക്കായി കാത്തിരിക്കുകയാണ്.
കലേന അഗ്രഹാര, ഹുലിമാവ്, ഐഐഎം ബെംഗളൂരു, ജെ.പി. നഗർ നാലാം ഘട്ടം, ജയദേവ ആശുപത്രി, തവരേക്കെരെ എന്നിവയാണ് ആദ്യഘട്ടത്തിലെ ആറ് സ്റ്റേഷനുകൾ. ജയദേവ ആശുപത്രി സ്റ്റേഷനിൽ പിങ്ക് ലൈനും നിലവിലുള്ള യെല്ലോ ലൈനും തമ്മിൽ ഇന്റർചേഞ്ച് സൗകര്യമുണ്ടാകും.
പാതയിൽ പരീക്ഷണ ഓട്ടങ്ങളും പരിശോധനകളും അവസാനഘട്ടത്തിലാണ്. റെയിൽവേ ബോർഡിന്റെയും മെട്രോ റെയിൽവേ സേഫ്റ്റി കമ്മിഷണറുടെയും (CMRS) ആവശ്യമായ അനുമതികൾ പൂർത്തിയാകുന്നതനുസരിച്ചായിരിക്കും വാണിജ്യ സർവീസ് ആരംഭിക്കുക. കൃത്യമായ ഉദ്ഘാടന തീയതി ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
നിലവിൽ ബെംഗളൂരു നമോ മെട്രോ ശൃംഖലയുടെ ദൈർഘ്യം ഏകദേശം 96 കിലോമീറ്ററാണ്. പിങ്ക് ലൈനിന്റെ ആദ്യഘട്ടം കൂടി പ്രവർത്തനം ആരംഭിക്കുന്നതോടെ ശൃംഖല 100 കിലോമീറ്റർ പിന്നിടും.
കലേന അഗ്രഹാര മുതൽ നാഗവാര വരെ നീളുന്ന പിങ്ക് ലൈനിന് ആകെ 21.25 കിലോമീറ്റർ ദൈർഘ്യമാണുള്ളത്. ഇതിൽ 7.5 കിലോമീറ്റർ ഉയർന്ന പാതയും 13.76 കിലോമീറ്റർ ഭൂഗർഭ പാതയുമാണ്. ആകെ 18 സ്റ്റേഷനുകളാണ് പദ്ധതിയിലുള്ളത്. ശേഷിക്കുന്ന ഭാഗം പിന്നീട് ഘട്ടംഘട്ടമായി പ്രവർത്തനസജ്ജമാക്കാനാണ് പദ്ധതി.
പിങ്ക് ലൈൻ പൂർണമായി പ്രവർത്തനമാരംഭിക്കുന്നതോടെ ബെംഗളൂരുവിലെ പ്രധാന മേഖലകളായ എം.ജി. റോഡ്, ശിവാജിനഗർ, പൊട്ടറി ടൗൺ, നാഗവാര തുടങ്ങിയ പ്രദേശങ്ങളിലേക്കുള്ള മെട്രോ കണക്റ്റിവിറ്റി മെച്ചപ്പെടും. പ്രത്യേകിച്ച് ബന്നർഘട്ട റോഡിലെ ഗതാഗതക്കുരുക്ക് കുറയ്ക്കാൻ ആദ്യഘട്ടം സഹായിക്കുമെന്നാണ് പ്രതീക്ഷ.
