മസ്കത്ത്: ഹോർമുസ് കടലിടുക്കിലൂടെയുള്ള വാണിജ്യ കപ്പൽ ഗതാഗതം സുഗമമാക്കാൻ ഒമാനുമായി സഹകരിച്ച് പുതിയ സമുദ്രപാത ഒരുക്കാൻ ഇറാൻ. ഹോർമുസിലെ കപ്പൽ ഗതാഗതവുമായി ബന്ധപ്പെട്ട് ഇറാനും ഗൾഫ് രാജ്യങ്ങളും തമ്മിലുള്ള ചർച്ചകൾക്കാണ് പുതിയ പാതയുടെ നിർദേശം പ്രധാന വിഷയമാകുന്നത്. ഇറാൻ വിദേശകാര്യ മന്ത്രി അബ്ബാസ് അറാഖ്ചിയാണ് ഇക്കാര്യം വ്യക്തമാക്കിയത്.
നിലവിലെ സുരക്ഷാ സാഹചര്യത്തിൽ ഹോർമുസ് കടലിടുക്കിലൂടെയുള്ള കപ്പൽ ഗതാഗതം ഗണ്യമായി കുറഞ്ഞിട്ടുണ്ട്. കപ്പലുകൾക്ക് സുരക്ഷിതമായി കടന്നുപോകാൻ നിയന്ത്രിത പാത ഒരുക്കുന്നതാണ് പുതിയ സംവിധാനത്തിന്റെ ലക്ഷ്യം. ഇറാനും ഒമാനും തമ്മിൽ നേരത്തേ താൽക്കാലിക കപ്പൽപാത സംബന്ധിച്ച് ധാരണയിലെത്തിയിരുന്നു.
പുതിയ സംവിധാനത്തെക്കുറിച്ച് ഗൾഫ് സഹകരണ കൗൺസിൽ (ജിസിസി) രാജ്യങ്ങളുമായി ചർച്ച നടത്താനാണ് ഇറാന്റെ നീക്കം. ഇറാൻ, ഒമാൻ, ഇറാഖ്, ജിസിസി രാജ്യങ്ങൾ എന്നിവ ഉൾപ്പെടുന്ന യോഗത്തിൽ ഹോർമുസ് വഴിയുള്ള കപ്പൽ ഗതാഗതത്തിന്റെ സുരക്ഷയും നിയന്ത്രണവും ചർച്ച ചെയ്യാനായിരുന്നു തീരുമാനം. എന്നാൽ പ്രാദേശിക രാജ്യങ്ങൾക്കിടയിൽ ധാരണയിലെത്താത്തതിനെ തുടർന്ന് യോഗം മാറ്റിവച്ചതായി റിപ്പോർട്ടുണ്ട്.
ഹോർമുസ് കടലിടുക്കിൽ അടുത്തിടെ വാണിജ്യ കപ്പലുകൾക്ക് നേരെ ആക്രമണങ്ങളുണ്ടായതും കപ്പൽ ഗതാഗതം തടസ്സപ്പെടാൻ കാരണമായിട്ടുണ്ട്. സെപ്റ്റംബർ 13ന് ഒരു കപ്പലിന് നേരെ അജ്ഞാത പ്രോജക്ടൈൽ പതിച്ച് തീപിടിത്തമുണ്ടായതായി റിപ്പോർട്ട് ചെയ്തു. അതേസമയം ആക്രമണത്തിന്റെ ഉത്തരവാദിത്തം ഔദ്യോഗികമായി സ്ഥിരീകരിച്ചിട്ടില്ല.
ഹോർമുസ് കടലിടുക്ക് ആഗോള എണ്ണവ്യാപാരത്തിലെ പ്രധാന ജലപാതകളിലൊന്നാണ്. ഇവിടെ ഗതാഗതം തടസ്സപ്പെടുന്നത് അന്താരാഷ്ട്ര ഊർജവിപണിയിൽ നേരിട്ട് പ്രതിഫലിക്കുന്ന സാഹചര്യത്തിൽ സുരക്ഷിതമായ കപ്പൽ ഗതാഗതം പുനഃസ്ഥാപിക്കാനുള്ള ശ്രമങ്ങൾക്ക് പ്രാധാന്യമേറുകയാണ്. നിലവിലെ സംഘർഷ സാഹചര്യത്തിൽ എണ്ണവിലയും ഉയർന്ന നിലയിലാണ്.
പുതിയ കപ്പൽപാത സംബന്ധിച്ച അന്തിമ ക്രമീകരണങ്ങളും ഗൾഫ് രാജ്യങ്ങളുമായുള്ള ധാരണയും ഇനിയും വ്യക്തമായിട്ടില്ല. അതിനാൽ പുതിയ പാത പൂർണമായി പ്രവർത്തനക്ഷമമായതായി നിലവിൽ പറയാനാകില്ല.
