മെൽബൺ: ഓസ്ട്രേലിയൻ ആദിവാസികളെ ഭൂമിയിലെ “ഏറ്റവും അപരിഷ്കൃത വംശം” എന്ന് വിശേഷിപ്പിച്ചുകൊണ്ട് വൺ നേഷൻ പാർട്ടി നേതാവ് പൗളിൻ ഹാൻസൻ നടത്തിയ വിവാദ പ്രസ്താവനയ്ക്കെതിരെ രൂക്ഷവിമർശനം. ഓസ്ട്രേലിയൻ ആദിവാസികൾ ചക്രം കണ്ടുപിടിച്ചിട്ടില്ല എന്ന വാദമാണ് തന്റെ വിവാദ പരാമർശത്തിന് തെളിവായി പൗളിൻ ഹാൻസൻ ഉയർത്തിക്കാട്ടിയത്.
എന്നാൽ, ഒരു ചക്രം കൊണ്ടുമാത്രം പ്രത്യേക പ്രയോജനമില്ലെന്നും അതിന് ആക്സിലുകളും വാഹനങ്ങളും കൂടാതെ വലിച്ച് കൊണ്ടുപോകാൻ മൃഗങ്ങളും ആവശ്യമാണെന്നും വിമർശകർ ചൂണ്ടിക്കാട്ടുന്നു. അന്നത്തെ ഓസ്ട്രേലിയൻ ഭൂപ്രകൃതിയിൽ കുതിരകളോ കന്നുകാലികളോ കഴുതകളോ ഉണ്ടായിരുന്നില്ല. അത്തരം സാഹചര്യത്തിൽ ചക്രത്തെക്കാൾ, തങ്ങൾ അധിവസിക്കുന്ന ഭൂപ്രദേശത്തിന് അനുയോജ്യമായ സാങ്കേതികവിദ്യകളാണ് തദ്ദേശീയരായ ജനങ്ങൾ വികസിപ്പിച്ചെടുത്തത്.
വണ്ടി വലിക്കാൻ ഒരു ചക്രം കണ്ടുപിടിക്കുന്നതിന് പകരം, അതിനേക്കാൾ ബുദ്ധിപരമായ ‘ബൂമറാങ്’ (Boomerang) എന്ന എയർഫോയിൽ സാങ്കേതികവിദ്യയാണ് അവർ നിർമ്മിച്ചതെന്ന് ചൂണ്ടിക്കാണിക്കപ്പെടുന്നു. അന്തരീക്ഷത്തിലൂടെ വളഞ്ഞ് പറന്ന് ലക്ഷ്യത്തിലെത്തിയ ശേഷം തിരികെ വരുന്ന ഈ ആയുധം അവരുടെ പ്രതിഭയുടെയും ഭൂമിശാസ്ത്രപരമായ അറിവിന്റെയും തെളിവാണെന്നും, ഇത്തരം കണ്ടുപിടുത്തങ്ങളെ അവഗണിച്ച് ആദിവാസി ജനതയെ അപരിഷ്കൃതരെന്ന് വിളിക്കുന്നത് തികച്ചും അടിസ്ഥാനരഹിതമാണെന്നും വ്യാപകമായ അഭിപ്രായമുയരുന്നുണ്ട്.
