ട്രരാൽഗൺ: വീട്ടു yard-ൽ നിന്ന് പ്രിയപ്പെട്ട പൂച്ചട്ടി അപരിചിതൻ മോഷ്ടിച്ചതറിഞ്ഞ് ഹൃദയം തകർന്ന് മൂന്ന് വയസ്സുകാരൻ. വിക്ടോറിയയിലെ ട്രരാൽഗണിൽ താമസിക്കുന്ന ഹാരി എന്ന മൂന്ന് വയസ്സുകാരന്റെ പൂച്ചട്ടിയാണ് കഴിഞ്ഞ വ്യാഴാഴ്ച മോഷണം പോയത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നു.
അമ്മയോടൊപ്പം മണിക്കൂറുകൾ ചെലവഴിച്ച് തിരഞ്ഞെടുത്ത ഏഴ് പൂച്ചട്ടികളിൽ ചെടികൾ നട്ടുപിടിപ്പിച്ചിരുന്നു കുഞ്ഞ് ഹാരി. ഇതിൽ മഞ്ഞപ്പൂക്കൾ നിറഞ്ഞ ചട്ടിയായിരുന്നു അവന് ഏറ്റവും പ്രിയപ്പെട്ടത്. കഴിഞ്ഞ വ്യാഴാഴ്ച രാത്രി 7:42-ഓടെ വീടിന്റെ മുൻവശത്തെ യാർഡിലേക്ക് ഒരാൾ അതിക്രമിച്ചു കയറുകയും ഈ പൂച്ചട്ടിയുമായി കടന്നുകളയുകയും ചെയ്യുന്ന ദൃശ്യങ്ങളാണ് സിസിടിവിയിൽ പതിഞ്ഞിട്ടുള്ളത്.
വെറും 25 ഡോളർ മാത്രം വിലമതിക്കുന്നതായിരുന്നു ആ പൂച്ചട്ടിയും ചെടികളുമെങ്കിലും ഹാരിക്ക് അത് അത്രയേറെ പ്രിയപ്പെട്ടതായിരുന്നു. പിറ്റേന്ന് രാവിലെ ചെടിച്ചട്ടി കാണാതായതറിഞ്ഞ് “അവർ ചോദിക്കുക പോലും ചെയ്തില്ലല്ലോ അമ്മേ” എന്നായിരുന്നു ഹാരിയുടെ നിഷ്കളങ്കമായ ചോദ്യം. സംഭവമറിഞ്ഞ പ്രദേശവാസികൾ കുടുംബത്തിന് പിന്തുണയുമായി രംഗത്തെത്തുകയും പൂക്കൾ വാങ്ങി നൽകാമെന്ന് അറിയിക്കുകയും ചെയ്തിട്ടുണ്ട്. മറ്റുള്ളവരുടെ വസ്തുക്കളോട് കാണിക്കേണ്ട സാമാന്യ മര്യാദയും മാന്യതയും നഷ്ടപ്പെടുന്ന ഇത്തരം പ്രവണതകൾക്കെതിരെ വലിയ പ്രതിഷേധമാണ് ഉയരുന്നത്.
