കാബൂൾ: അഫ്ഗാനിസ്ഥാനിലെ അതിർത്തി പ്രദേശങ്ങൾ ലക്ഷ്യമാക്കി പാകിസ്ഥാൻ വീണ്ടും ശക്തമായ വ്യോമാക്രമണം നടത്തി. വടക്കുകിഴക്കൻ അഫ്ഗാനിസ്ഥാനിലെ കുനാർ പ്രവിശ്യയിൽ തിങ്കളാഴ്ച പുലർച്ചെയുണ്ടായ ആക്രമണത്തിൽ മൂന്ന് പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു. പാകിസ്ഥാനിലെ വടക്കുപടിഞ്ഞാറൻ മേഖലയിലുള്ള പോലീസ് സ്റ്റേഷന് നേരെ അടുത്തിടെയുണ്ടായ ചാവേർ ആക്രമണത്തിനുള്ള തിരിച്ചടിയായാണ് ഈ സൈനിക നടപടിയെന്നാണ് റിപ്പോർട്ടുകൾ സൂചിപ്പിക്കുന്നത്. വ്യോമാക്രമണത്തിന് പിന്നാലെ ഇരു രാജ്യങ്ങളും തമ്മിലുള്ള അതിർത്തി പ്രദേശങ്ങളിൽ സംഘർഷവും വെടിവെപ്പും ശക്തമായിട്ടുണ്ട്.
തങ്ങളുടെ രാജ്യത്ത് ഭീകരാക്രമണങ്ങൾ നടത്തുന്ന തെഹ്രീകെ താലിബാൻ പാകിസ്ഥാൻ (ടി.ടി.പി) ഉൾപ്പെടെയുള്ള നിരോധിത സംഘടനകൾക്ക് അഫ്ഗാൻ മണ്ണിൽ താവളമൊരുക്കുന്നുവെന്നാണ് പാകിസ്ഥാന്റെ ആരോപണം. എന്നാൽ ഈ ആരോപണങ്ങൾ അഫ്ഗാനിസ്ഥാനിലെ താലിബാൻ ഭരണകൂടം പൂർണ്ണമായും തള്ളി. പാകിസ്ഥാന്റെ സ്വന്തം ആഭ്യന്തര സുരക്ഷാ വീഴ്ചകൾക്ക് അഫ്ഗാനിസ്ഥാനെ പഴിചാരേണ്ടതില്ലെന്നും, പരമാധികാരം ലംഘിച്ച് അതിർത്തി കടന്ന് ആക്രമണം നടത്തിയാൽ ശക്തമായ തിരിച്ചടി നൽകുമെന്നും താലിബാൻ വക്താവ് സബീഹുള്ള മുജാഹിദ് മുന്നറിയിപ്പ് നൽകി.
അതിർത്തി കടന്നുള്ള ഭീകരവാദ ആരോപണങ്ങളും തർക്കങ്ങളും ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളാക്കിയിരിക്കുകയാണ്.പ്രദേശത്ത് വർദ്ധിച്ചുവരുന്ന സംഘർഷാവസ്ഥ പൂർണ്ണ തോതിലുള്ള സൈനിക ഏറ്റുമുട്ടലിലേക്ക് വഴിമാറുമോ എന്ന ആശങ്കയിലാണ് അന്താരാഷ്ട്ര സമൂഹം. സൈനിക നടപടികൾക്ക് പകരം പ്രശ്നപരിഹാരത്തിനായി രഹസ്യാന്വേഷണ വിവരങ്ങൾ പങ്കുവെക്കാനും ഉഭയകക്ഷി ചർച്ചകൾ നടത്താനും തങ്ങൾ തയ്യാറാണെന്ന് അഫ്ഗാനിസ്ഥാൻ വ്യക്തമാക്കിയിട്ടുണ്ടെങ്കിലും മേഖലയിൽ കടുത്ത ജാഗ്രത തുടരുകയാണ്.
