തിരുവനന്തപുരം: മാസപ്പടി കേസിൽ പ്രതിപക്ഷ നേതാവ് പിണറായി വിജയൻ, മുൻ മന്ത്രി പി. എ. മുഹമ്മദ് റിയാസ്, ടി. വീണ എന്നിവർക്കെതിരായ അന്വേഷണത്തിന് പ്രത്യേക അന്വേഷണ സംഘം (SIT) രൂപീകരിക്കുന്നതിൽ സർക്കാർ ഇന്ന് തീരുമാനമെടുക്കും. എൻഫോഴ്സ്മെന്റ് ഡയറക്ടറേറ്റ് (ED) നൽകിയ കത്തിന്റെ അടിസ്ഥാനത്തിലാണ് തുടർനടപടി പരിഗണിക്കുന്നത്.
കേസിൽ പ്രാഥമിക അന്വേഷണം നടത്തുന്നതിനായി ക്രൈംബ്രാഞ്ചിന്റെ നേതൃത്വത്തിൽ SIT രൂപീകരിക്കാനാണ് സർക്കാർ ആലോചിക്കുന്നത്. അന്വേഷണത്തിന്റെ ഭാഗമായി ആരോപണങ്ങളുമായി ബന്ധപ്പെട്ട രേഖകളും ഇടപാടുകളും പരിശോധിക്കുകയും ബന്ധപ്പെട്ടവരുടെ മൊഴിയെടുക്കുകയും ചെയ്യുമെന്നാണ് റിപ്പോർട്ട്.
മാസപ്പടി കേസുമായി ബന്ധപ്പെട്ട് നേരിട്ട് കേസ് രജിസ്റ്റർ ചെയ്ത് അന്വേഷണം നടത്തുന്നതിന് നിയമപരമായി തടസമില്ലെന്ന നിയമോപദേശം ലഭിച്ചതായും റിപ്പോർട്ടുകളുണ്ട്. അഴിമതി നിരോധന നിയമം ഉൾപ്പെടെയുള്ള വ്യവസ്ഥകൾ പ്രകാരമുള്ള അന്വേഷണ സാധ്യതയും പരിശോധിക്കുന്നുണ്ട്.
അതേസമയം, അന്വേഷണ തീരുമാനം നിയമപരമായും രാഷ്ട്രീയമായും നേരിടുമെന്ന് സിപിഎം വ്യക്തമാക്കിയിട്ടുണ്ട്. അന്വേഷണം പ്രഖ്യാപിച്ചാൽ നിയമപരമായ നടപടികൾ സ്വീകരിക്കുന്നതും പ്രതിഷേധ പരിപാടികൾ സംഘടിപ്പിക്കുന്നതും സംബന്ധിച്ച് പാർട്ടി സംസ്ഥാന സെക്രട്ടേറിയറ്റ് തീരുമാനിച്ചതായി റിപ്പോർട്ടുണ്ട്.
