തിരുവനന്തപുരം: ഐച്ചി-നാഗോയ ഏഷ്യൻ ഗെയിംസിൽ രണ്ട് വെള്ളി മെഡലുകൾ നേടി ചരിത്രം കുറിച്ച മലയാളി ഷൂട്ടിങ് താരം ശ്രീമതി വിദർശ കെ. വിനോദിനെ കേരള ബാങ്ക് ആദരിച്ചു. ബാങ്കിന്റെ ആഭിമുഖ്യത്തിൽ സംഘടിപ്പിച്ച ചടങ്ങിൽ പ്രസിഡന്റ് പി. മോഹനൻ മാസ്റ്റർ വിദർശയ്ക്ക് സ്നേഹോപഹാരം കൈമാറി.
അന്താരാഷ്ട്ര കായികവേദിയിൽ മികച്ച പ്രകടനത്തിലൂടെ രാജ്യത്തിനും കേരളത്തിനും അഭിമാനകരമായ നേട്ടം സമ്മാനിച്ച താരത്തെ ബാങ്ക് അധികൃതർ അഭിനന്ദിച്ചു. കായികരംഗത്ത് മലയാളി താരങ്ങൾ കൈവരിക്കുന്ന ഇത്തരം സമാനതകളില്ലാത്ത നേട്ടങ്ങൾ വരുംതലമുറയ്ക്ക് വലിയ പ്രചോദനമാണെന്ന് ചടങ്ങിൽ സംസാരിച്ചവർ വ്യക്തമാക്കി. ബാങ്കിന്റെ ഉന്നത ഉദ്യോഗസ്ഥരും ചടങ്ങിൽ സന്നിഹിതരായിരുന്നു.
