കുമളി: തേക്കടിയിൽ സംസ്ഥാനതല വനംവന്യജീവി വാരാഘോഷത്തിന്റെ ഭാഗമായി ഒരുക്കിയ പ്രധാന വേദി തകർന്നുവീണു മൂന്ന് പോലീസുകാർക്കും ഒരു ലൈറ്റ് ആൻഡ് സൗണ്ട് ജീവനക്കാരനും പരിക്കേറ്റു. മന്ത്രിയും എംഎൽഎമാരും പങ്കെടുത്ത പ്രധാന ചടങ്ങുകൾ ഉച്ചയ്ക്ക് 12:30-ഓടെ സമാപിച്ചിരുന്നു. പരിപാടി പൂർത്തിയായി മണിക്കൂറുകൾക്ക് ശേഷം വേദി അഴിച്ചുമാറ്റാൻ ശ്രമിക്കുന്നതിനിടെയാണ് അപ്രതീക്ഷിതമായി അപകടമുണ്ടായത്.
വേദിയിലുണ്ടായിരുന്ന എൽഇഡി (LED) വാൾ അഴിച്ചുമാറ്റുകയായിരുന്ന സൗണ്ട്സ് ജീവനക്കാരനും അവിടെ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർക്കുമാണ് പരിക്കേറ്റത്. ഉടൻ തന്നെ ഇവരെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്ന് പ്രാഥമിക ശുശ്രൂഷയ്ക്ക് ശേഷം അധികൃതർ വ്യക്തമാക്കി.
പരിപാടി കഴിഞ്ഞ് ജനങ്ങളും വിനോദസഞ്ചാരികളും നേരത്തെ തന്നെ വേദിക്ക് സമീപത്തുനിന്ന് മാറിയ സമയത്താണ് സംഭവമുണ്ടായത്. വേദിക്ക് സമീപം മറ്റ് ആളുകളോ വിനോദസഞ്ചാരികളോ ഇല്ലാതിരുന്നതിനാൽ വൻ ദുരന്തം ഒഴിവായി. സംഭവത്തെത്തുടർന്ന് കുമളി പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. പന്തൽ നിർമ്മാണത്തിലെ അപാകതയാണോ അപകടത്തിന് കാരണമായതെന്ന് പോലീസ് പരിശോധിച്ചുവരികയാണ്.
