ന്യൂഡൽഹി: ഡൽഹിയും ഉത്തർപ്രദേശും കേന്ദ്രീകരിച്ച് പ്രവർത്തിച്ചിരുന്ന വൻ അന്തർസംസ്ഥാന മയക്കുമരുന്ന് സംഘത്തെ ഡൽഹി പോലീസ് വലയിലാക്കി. അന്താരാഷ്ട്ര വിപണിയിൽ ഏകദേശം 50 കോടി രൂപ വിലമതിക്കുന്ന ഏഴ് കിലോഗ്രാമിലധികം ഹെറോയിനാണ് റെയ്ഡിൽ പിടിച്ചെടുത്തത്. സംഭവവുമായി ബന്ധപ്പെട്ട് നാല് പേരെ പോലീസ് അറസ്റ്റ് ചെയ്തു. ഡൽഹി പോലീസിന്റെ രോഹിണി ജില്ലാ സ്പെഷ്യൽ സ്റ്റാഫ് സംഘമാണ് ഈ നിർണായക മയക്കുമരുന്ന് വേട്ടയ്ക്ക് നേതൃത്വം നൽകിയത്.
ഡൽഹിയിൽ നടത്തിയ ആദ്യഘട്ട പരിശോധനയിൽ ലഭിച്ച വിവരങ്ങളുടെ അടിസ്ഥാനത്തിൽ ഉത്തർപ്രദേശിലെ ലക്നൗവിലേക്ക് അന്വേഷണം വ്യാപിപ്പിക്കുകയായിരുന്നു. ലക്നൗവിൽ രഹസ്യമായി പ്രവർത്തിച്ചിരുന്ന അനധികൃത മയക്കുമരുന്ന് നിർമ്മാണ ശാല കണ്ടെത്തിയ പോലീസ് സംഘം അവിടെ നിന്ന് വൻതോതിൽ രാസവസ്തുക്കളും ഉപകരണങ്ങളും പിടിച്ചെടുത്തു. ഉത്തർപ്രദേശിലെ ബറേലിയിൽ നിന്ന് 120 കിലോമീറ്ററോളം പിന്തുടർന്നാണ് ഈ ലഹരി ശൃംഖലയുടെ മുഖ്യസൂത്രധാരനായ റുക്സാർ അലിയെ പോലീസ് സാഹസികമായി പിടികൂടിയത്.
ലക്നൗവിലെ കേന്ദ്രത്തിൽ നിന്ന് വൻതോതിൽ ഹെറോയിൻ നിർമ്മിക്കാനുള്ള അസംസ്കൃത വസ്തുക്കളും ലഹരിമരുന്ന് പാക്കിംഗ് സാമഗ്രികളും പോലീസ് കണ്ടെടുത്തിട്ടുണ്ട്. പ്രതികളിൽ നിന്ന് രണ്ട് ആഡംബര വാഹനങ്ങളും ലക്ഷക്കണക്കിന് രൂപയും അന്വേഷണ സംഘം പിടിച്ചെടുത്തു. സംഘത്തിന്റെ സാമ്പത്തിക ഇടപാടുകളെക്കുറിച്ചും മറ്റ് സംസ്ഥാനങ്ങളിലെ വിതരണ ശൃംഖലകളെക്കുറിച്ചും പോലീസ് വിശദമായ അന്വേഷണം നടത്തി വരികയാണ്.
