തിരുവനന്തപുരം: വാടക ഹെലികോപ്റ്റർ ലഭ്യമാക്കുന്നതിനായി ചിപ്‌സൻ ഏവിയേഷനുമായുള്ള കരാർ ഇനി പുതുക്കില്ലെന്ന് സംസ്ഥാന സർക്കാർ ലോകായുക്തയെ അറിയിച്ചു. മുഖ്യമന്ത്രി വി.ഡി. സതീശന്റെ വിവാദമായ ചാർട്ടേഡ് വിമാനയാത്രയുമായി ബന്ധപ്പെട്ട പരാതി പരിഗണിക്കവെയാണ് ഡയറക്ടർ ജനറൽ ഓഫ് പ്രോസിക്യൂഷൻ സർക്കാരിന്റെ നിലപാട് വ്യക്തമാക്കിയത്. മുഖ്യമന്ത്രി മലപ്പുറത്തേക്ക് പോയത് വ്യക്തിപരമായ ആവശ്യങ്ങൾക്കല്ലെന്നും ഔദ്യോഗിക ആവശ്യങ്ങൾക്കായിരുന്നുവെന്നും പ്രോസിക്യൂഷൻ ബോധിപ്പിച്ചു. യാത്രയുമായി ബന്ധപ്പെട്ട് ചിപ്‌സൻ നൽകിയ ഇൻവോയ്സ് ലോകായുക്തയ്ക്ക് മുമ്പാകെ ഹാജരാക്കി. കേസ് കൂടുതൽ വാദത്തിനായി നവംബർ മൂന്നിലേക്ക് മാറ്റി.
മുഖ്യമന്ത്രിയുടെ ചാർട്ടേഡ് വിമാനയാത്രയ്‌‌ക്കെതിരായ പരാതിയിൽ യാത്രാരേഖകൾ ഹാജരാക്കാൻ ലോകായുക്ത നേരത്തേ നിർദേശിച്ചിരുന്നു. പൊതുപ്രവർത്തകനായ കെ.എം. ഷാജഹാൻ നൽകിയ ഹർജിയിലാണ് ലോകായുക്തയുടെ നടപടി. മുഖ്യമന്ത്രി സ്വജനപക്ഷപാതവും അധികാര ദുർവിനിയോഗവും നടത്തിയെന്നാണ് ഹർജിക്കാരന്റെ പ്രധാന ആരോപണം.
സർക്കാരുമായി വാടക ഹെലികോപ്റ്റർ കരാർ നീട്ടിക്കിട്ടാൻ കാത്തിരിക്കുന്ന ചിപ്‌സൻ എയർവെയ്‌സാണ് മുഖ്യമന്ത്രിയുടെ വിമാനയാത്രയ്ക്കുള്ള പണം ചെലവഴിച്ചതെന്നും, കമ്പനിയിൽ നിന്ന് മുഖ്യമന്ത്രി നേരിട്ട് ആനുകൂല്യം കൈപ്പറ്റുകയാണുണ്ടായതെന്നും പരാതിയിൽ ഉന്നയിച്ചിരുന്നു. സംഭവത്തിൽ അഴിമതി നടന്നിട്ടുണ്ടോയെന്ന് കണ്ടെത്താൻ വിമാനയാത്രയുടെ സമഗ്രമായ രേഖകൾ വിളിച്ചുവരുത്തി പരിശോധിക്കണമെന്നും ഹർജിക്കാരൻ ആവശ്യപ്പെട്ടിരുന്നു.
