സിഡ്നി: മതപരമായ പീഡനം നേരിടുന്നുവെന്ന് കാണിച്ച് ഇന്ത്യൻ മുസ്ലിം യുവാവ് സമർപ്പിച്ച അഭയാർത്ഥി അപേക്ഷാ അപ്പീൽ ഇമിഗ്രേഷൻ ട്രിബ്യൂണൽ തള്ളി. യുവാവ് മുന്നോട്ടുവെച്ച വാദങ്ങളിലെ വൈരുദ്ധ്യങ്ങളും തിരിമറി നടത്തിയ ആശുപത്രി രേഖകളും പരിശോധിച്ച ശേഷമാണ് ട്രിബ്യൂണലിന്റെ ഈ നിർണ്ണായക നടപടി.
ഇന്ത്യയിൽ താൻ കടുത്ത സുരക്ഷാ ഭീഷണി നേരിടുന്നുണ്ടെന്നായിരുന്നു ഇയാളുടെ പ്രധാന വാദം. എന്നാൽ, ഇയാൾ ഹാജരാക്കിയ മെഡിക്കൽ രേഖകളിൽ കൃത്രിമം നടന്നിട്ടുണ്ടെന്ന് ട്രിബ്യൂണൽ കണ്ടെത്തുകയായിരുന്നു. കൂടാതെ, യുവാവിന്റെ മാതാപിതാക്കളും സഹോദരങ്ങളും ഇപ്പോഴും നാട്ടിലെ അതേ ഗ്രാമത്തിൽ യാതൊരുവിധ അക്രമങ്ങളോ ഭീഷണികളോ നേരിടാതെ സുരക്ഷിതമായി ജീവിക്കുന്നുണ്ടെന്ന വസ്തുതയും ട്രിബ്യൂണൽ പ്രധാന തെളിവായി പരിഗണിച്ചു. ഇയാളുടെ വാദങ്ങൾ വിശ്വസനീയമല്ലെന്ന് വ്യക്തമാക്കിയാണ് അപ്പീൽ അധികൃതർ തള്ളിയത്.
