ബെയ്ജിങ്: ചൈനയെയും ഉത്തരകൊറിയയെയും ബന്ധിപ്പിക്കുന്ന ന്യൂ യാലു നദി പാലം ഔദ്യോഗികമായി തുറന്നു. ഇരുരാജ്യങ്ങളും തമ്മിലുള്ള വ്യാപാരവും ചരക്കുനീക്കവും വർധിപ്പിക്കുകയാണ് പാലത്തിന്റെ പ്രധാന ലക്ഷ്യം. ഒരു ദശാബ്ദത്തിലേറെ നീണ്ട കാത്തിരിപ്പിനുശേഷം ഒക്ടോബർ 15-നാണ് പാലം ഗതാഗതത്തിനായി തുറന്നത്.
ചൈനയിലെ അതിർത്തി നഗരമായ ഡാൻഡോങ്ങിനെയും ഉത്തരകൊറിയയിലെ സിനുയിജുവിനെയും ബന്ധിപ്പിക്കുന്ന പാലത്തിന് ഏകദേശം മൂന്ന് കിലോമീറ്ററാണ് നീളം. നാലുവരിപ്പാതയുള്ള പാലത്തിലൂടെ ഇരുദിശകളിലേക്കും വാഹനങ്ങൾക്ക് സഞ്ചരിക്കാനാകും. ഉദ്ഘാടനത്തോടനുബന്ധിച്ച് ഇരുരാജ്യങ്ങളുടെയും പതാകകൾ അലങ്കരിച്ച ചരക്കുലോറികൾ പാലത്തിലൂടെ കടന്നുപോയി.
2011-ൽ നിർമാണം ആരംഭിച്ച പാലം 2014-ഓടെ പൂർത്തിയായെങ്കിലും ഗതാഗതത്തിനായി തുറക്കുന്നത് നീണ്ടുപോയി. ഉത്തരകൊറിയയുടെ ഭാഗത്തെ അനുബന്ധ റോഡുകളുടെയും കസ്റ്റംസ് സംവിധാനങ്ങളുടെയും നിർമാണം പൂർത്തിയാകാത്തതും പിന്നീട് കോവിഡ് മഹാമാരിയെ തുടർന്നുണ്ടായ അതിർത്തി നിയന്ത്രണങ്ങളുമാണ് കാലതാമസത്തിന് കാരണമായത്.
ഇരുരാജ്യങ്ങളും തമ്മിലുള്ള വ്യാപാരത്തിന്റെ പ്രധാന പാതയായി നിലവിൽ ഉപയോഗിക്കുന്ന പഴയ ചൈന–കൊറിയ സൗഹൃദപാലത്തിലെ തിരക്ക് കുറയ്ക്കാനും പുതിയ പാലം സഹായിക്കുമെന്നാണ് പ്രതീക്ഷ. ചൈന ഉത്തരകൊറിയയുടെ ഏറ്റവും വലിയ വ്യാപാര പങ്കാളിയാണ്. പുതിയ ഗതാഗതബന്ധം വ്യാപാര ഇടപാടുകൾക്കും ചരക്കുനീക്കത്തിനും കൂടുതൽ സൗകര്യമൊരുക്കും.
ചൈനീസ് പ്രധാനമന്ത്രി ലി ചിയാങും ഉത്തരകൊറിയൻ പ്രധാനമന്ത്രി പാക് തേ സോങ്ങും ഉദ്ഘാടനച്ചടങ്ങിൽ വിഡിയോ കോൺഫറൻസിലൂടെ പങ്കെടുത്തു. ഇരുരാജ്യങ്ങളും തമ്മിലുള്ള സാമ്പത്തിക-വ്യാപാര സഹകരണം ശക്തിപ്പെടുത്തുന്നതിൽ പാലത്തിന് പ്രധാന പങ്കുണ്ടെന്ന് ചൈനീസ് പ്രധാനമന്ത്രി സന്ദേശത്തിൽ വ്യക്തമാക്കി.
ഉത്തരകൊറിയയും റഷ്യയും തമ്മിൽ പുതിയ റോഡ് പാലം തുറന്നതിന് പിന്നാലെയാണ് ചൈനയുമായുള്ള ഈ ഗതാഗതബന്ധവും പ്രവർത്തനക്ഷമമായത്. മേഖലയിൽ സാമ്പത്തികവും തന്ത്രപരവുമായ ബന്ധങ്ങൾ ശക്തിപ്പെടുത്താനുള്ള ഉത്തരകൊറിയയുടെ നീക്കങ്ങളുടെ ഭാഗമായാണ് പുതിയ പാലത്തിന്റെ ഉദ്ഘാടനത്തെ നിരീക്ഷകർ വിലയിരുത്തുന്നത്.
