കൊല്ലം: പശ്ചിമഘട്ടത്തിന്റെ മനോഹരമായ പ്രകൃതിഭംഗി ആസ്വദിച്ച് യാത്ര ചെയ്യാൻ അവസരമൊരുക്കിക്കൊണ്ട്, ദക്ഷിണ റെയിൽവേയുടെ ആദ്യ വിസ്റ്റാഡോം കോച്ച് ചെങ്കോട്ട – പുനലൂർ – കൊല്ലം റെയിൽവേ പാതയിലൂടെ സർവീസ് നടത്തുന്നു. ട്രെയിൻ നമ്പർ 16327/16328 മധുര – ഗുരുവായൂർ – മധുര എക്സ്പ്രസിലാണ് വിനോദസഞ്ചാരികൾക്ക് ഏറെ പ്രിയങ്കരമായ വിസ്റ്റാഡോം കോച്ച് ഘടിപ്പിക്കുന്നത്.
ട്രെയിൻ നമ്പർ 16327 മധുര – ഗുരുവായൂർ എക്സ്പ്രസിൽ 2026 ഒക്ടോബർ 22 മുതൽ 2027 ജനുവരി 15 വരെയാണ് വിസ്റ്റാഡോം കോച്ച് സർവീസ് നടത്തുക. വ്യാഴം, വെള്ളി, ശനി, ഞായർ ദിവസങ്ങളിലായിരിക്കും ഈ ട്രെയിനിൽ വിസ്റ്റാഡോം സൗകര്യം ലഭ്യമാകുക.
മടക്ക സർവീസായ ട്രെയിൻ നമ്പർ 16328 ഗുരുവായൂർ – മധുര എക്സ്പ്രസിൽ 2026 ഒക്ടോബർ 23 മുതൽ 2027 ജനുവരി 16 വരെ വിസ്റ്റാഡോം കോച്ച് ഘടിപ്പിക്കും. വെള്ളി, ശനി, ഞായർ, തിങ്കൾ ദിവസങ്ങളിലാണ് ഈ ട്രെയിനിൽ സർവീസ് ക്രമീകരിച്ചിരിക്കുന്നത്. പ്രകൃതിരമണീയമായ മലയോര പാതയിലൂടെ പശ്ചിമഘട്ട കാഴ്ചകൾ അടുത്തറിഞ്ഞ് യാത്ര ചെയ്യാനുള്ള മികച്ചൊരു അവസരമാണ് ഇതിലൂടെ ഒരുങ്ങുന്നത്.
