മോസ്കോ: അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള അഭിപ്രായഭിന്നത രൂക്ഷമാകുന്നതിനിടെ റഷ്യയ്ക്കുനേരെ വൻ ഡ്രോൺ ആക്രമണം നടത്തി യുക്രെയ്ൻ. ഞായറാഴ്ച ആയിരത്തിലേറെ ഡ്രോണുകൾ റഷ്യൻ പ്രദേശങ്ങളിലേക്ക് അയച്ചതായാണ് റിപ്പോർട്ട്. സെന്റ് പീറ്റേഴ്‌സ്ബർഗിലെ എണ്ണ കയറ്റുമതി ടെർമിനലിലും എണ്ണ സംഭരണ കേന്ദ്രത്തിലും ആക്രമണത്തെത്തുടർന്ന് തീപിടിത്തമുണ്ടായി. ഒരാൾ കൊല്ലപ്പെടുകയും അഞ്ചുപേർക്ക് പരിക്കേൽക്കുകയും ചെയ്തതായി പ്രാദേശിക ഗവർണർ അറിയിച്ചു.
റഷ്യൻ പ്രതിരോധ മന്ത്രാലയത്തിന്റെ കണക്കനുസരിച്ച്, റഷ്യയിലെ 15 മേഖലകൾ, അധിനിവേശത്തിലുള്ള ക്രിമിയ, കരിങ്കടൽ എന്നിവിടങ്ങളിലായി 1,015 യുക്രെയ്ൻ ഡ്രോണുകൾ വെടിവച്ചിട്ടു. സെന്റ് പീറ്റേഴ്‌സ്ബർഗിലെ ഇ-കൊമേഴ്‌സ് കമ്പനിയായ ഒസോണിന്റെ ലോജിസ്റ്റിക്‌സ് കേന്ദ്രത്തിലും സാങ്കേതിക കമ്പനിയായ വി.കെ.യുടെ ഡാറ്റാ സെന്ററിലും ആക്രമണമുണ്ടായതായി കമ്പനികൾ അറിയിച്ചു. ആക്രമണത്തെത്തുടർന്ന് നഗരത്തിലെ വിമാനത്താവളത്തിന്റെ പ്രവർത്തനങ്ങളും തടസ്സപ്പെട്ടു.
റഷ്യയ്ക്കെതിരായ പുതിയ ഉപരോധങ്ങൾ നടപ്പാക്കുന്നത് താൽക്കാലികമായി മാറ്റിവച്ച തീരുമാനത്തെ ട്രംപ് ന്യായീകരിച്ചതിനു പിന്നാലെയാണ് ആക്രമണം. ഉപരോധങ്ങൾ റഷ്യയെ നയതന്ത്ര ചർച്ചകളിൽനിന്ന് അകറ്റാൻ ഇടയാക്കുമെന്നാണ് ട്രംപിന്റെ നിലപാട്. എന്നാൽ, റഷ്യയ്ക്കെതിരായ ഉപരോധങ്ങളിൽ ഇളവ് നൽകുന്നത് പ്രസിഡന്റ് വ്‌ളാഡിമിർ പുടിന്റെ യുദ്ധശ്രമങ്ങൾക്ക് സഹായകരമാകുമെന്ന് യുക്രെയ്ൻ പ്രസിഡന്റ് വൊളോഡിമിർ സെലൻസ്കി വിമർശിച്ചു.
റഷ്യയും യുക്രെയ്‌നും ഊർജമേഖലയിലെ ആക്രമണങ്ങൾ നിർത്തിവയ്ക്കാൻ ധാരണയിലെത്തിയെന്ന് ട്രംപ് നേരത്തേ പ്രഖ്യാപിച്ചിരുന്നു. എന്നാൽ, യുക്രെയ്‌നിലെ ഊർജ അടിസ്ഥാനസൗകര്യങ്ങൾക്കെതിരെ റഷ്യ ആക്രമണം തുടരുകയാണെന്ന് സെലൻസ്കി ആരോപിച്ചു. കഴിഞ്ഞ ഒരാഴ്ചയ്ക്കിടെ യുക്രെയ്‌നിലെ ഊർജമേഖലയ്ക്കുനേരെ 76 ആക്രമണങ്ങളുണ്ടായതായും അദ്ദേഹം പറഞ്ഞു. ഇരുരാജ്യങ്ങളും തമ്മിലുള്ള യുദ്ധത്തിനൊപ്പം വാഷിങ്ടണും കീവുമിടയിലെ നയതന്ത്ര സംഘർഷവും ശക്തമാകുകയാണ്.
