ഐച്ചി–നഗോയ: ഭിന്നശേഷിക്കാരായ കായികതാരങ്ങളുടെ ഏഷ്യൻ പോരാട്ടമായ 2026 ഏഷ്യൻ പാരാ ഗെയിംസിന് ജപ്പാനിലെ ഐച്ചി–നഗോയയിൽ തുടക്കമായി. ഒക്ടോബർ 18ന് നടന്ന ഉദ്ഘാടനച്ചടങ്ങോടെ ഔദ്യോഗികമായി ആരംഭിച്ച മത്സരങ്ങൾ 24 വരെ നീളും. ഏഷ്യയിലെ 45 ദേശീയ പാരാലിമ്പിക് കമ്മിറ്റികളിൽ നിന്നുള്ള താരങ്ങളാണ് മത്സരിക്കുന്നത്.
മത്സരങ്ങളിൽ 18 കായിക ഇനങ്ങളിലായി 492 മെഡൽ ഇനങ്ങളാണുള്ളത്. ഏകദേശം 3,000 കായികതാരങ്ങൾ പങ്കെടുക്കുന്ന ഗെയിംസിന്റെ ഉദ്ഘാടനച്ചടങ്ങ് നഗോയ സിറ്റി മിസുഹോ അത്‌ലറ്റിക് സ്റ്റേഡിയത്തിലാണ് നടന്നത്. ജപ്പാൻ ചക്രവർത്തി നരുഹിതോ ഗെയിംസ് ഔദ്യോഗികമായി ഉദ്ഘാടനം ചെയ്തു.
ഇന്ത്യയെ പ്രതിനിധീകരിച്ച് 168 കായികതാരങ്ങളാണ് മത്സരിക്കുന്നത്. ഇതിൽ 112 പുരുഷന്മാരും 56 വനിതകളും ഉൾപ്പെടുന്നു. പ്രമോദ് ഭഗത്തും സിമ്രാൻ ശർമയുമാണ് ഉദ്ഘാടനച്ചടങ്ങിലെ മാർച്ച് പാസ്റ്റിൽ ഇന്ത്യൻ പതാകയേന്തിയത്. 2022ൽ ചൈനയിലെ ഹാങ്ഷൗവിൽ നടന്ന പാരാ ഏഷ്യൻ ഗെയിംസിൽ 108 മെഡലുകൾ നേടിയ ഇന്ത്യ ഇത്തവണയും മികച്ച നേട്ടമാണ് ലക്ഷ്യമിടുന്നത്.
‘വി ആർ ബ്യൂട്ടിഫുൾ ഇൻഡിവിജ്വൽസ്’ (WABI) എന്നതാണ് ഇത്തവണത്തെ ഗെയിംസിന്റെ പ്രമേയം. ഉദ്ഘാടനച്ചടങ്ങിന് മുമ്പുതന്നെ ചില ഇനങ്ങളിൽ മത്സരങ്ങൾ ആരംഭിച്ചിരുന്നു. വീൽചെയർ റഗ്ബി ഉൾപ്പെടെ 18 കായിക ഇനങ്ങളിലായാണ് മത്സരങ്ങൾ നടക്കുന്നത്. ഒക്ടോബർ 24നാണ് സമാപനച്ചടങ്ങ്.
