വിശാഖപട്ടണം: ബംഗാൾ ഉൾക്കടലിൽ രൂപംകൊണ്ട ‘ഓർണബ്’ ചുഴലിക്കാറ്റ് കൂടുതൽ ശക്തി പ്രാപിച്ച് ആന്ധ്രാപ്രദേശ് തീരത്തേക്ക് നീങ്ങുന്നതായി കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. നിലവിലെ സഞ്ചാരപഥം അനുസരിച്ച് ഇന്ന് വൈകുന്നേരത്തോടെ അതിതീവ്ര ചുഴലിക്കാറ്റായി മാറുന്ന ഓർണബ്, നാളെ രാവിലെ കരതൊടുമെന്നാണ് കണക്കുകൂട്ടൽ. ചുഴലിക്കാറ്റിന്റെ സ്വാധീനഫലമായി ആന്ധ്രാപ്രദേശിലും ഒഡീഷയിലും കനത്ത മഴയ്ക്ക് സാധ്യതയുണ്ട്.
പ്രതികൂല കാലാവസ്ഥ കണക്കിലെടുത്ത് അടുത്ത രണ്ട് ദിവസങ്ങളിൽ തീരദേശ ആന്ധ്രാപ്രദേശിൽ അതീവ ജാഗ്രതാ നിർദേശമായ റെഡ് അലർട്ട് പ്രഖ്യാപിച്ചു. ചുഴലിക്കാറ്റ് ഭീഷണിയെത്തുടർന്ന് മുൻകരുതൽ നടപടികളുടെ ഭാഗമായി മേഖലയിലൂടെയുള്ള ചില ട്രെയിൻ സർവീസുകൾ പൂർണമായും റദ്ദാക്കുകയും മറ്റു ചിലത് യാത്ര ചുരുക്കുകയും ചെയ്തിട്ടുണ്ട്. ദുരന്തസാധ്യത മുൻനിർത്തി തീരമേഖലകളിൽ അധികൃതർ സുരക്ഷാ സന്നാഹങ്ങൾ ശക്തമാക്കി.
