സിഡ്നി: പ്രകൃതിദുരന്തങ്ങളെ നേരിടുന്നതിനും ജനങ്ങളുടെ സുരക്ഷയും പുനരധിവാസവും ഉറപ്പാക്കുന്നതിനുമായി ലാഭേച്ഛയില്ലാതെ പ്രവർത്തിക്കുന്ന പുതിയ ജീവകാരുണ്യ കൂട്ടായ്മയായ ‘ഓസ്ട്രേലിയൻ ഫൗണ്ടേഷൻ ഫോർ ഡിസാസ്റ്റർ റിലീഫ്’ സിഡ്നിയിൽ പ്രവർത്തനം ആരംഭിച്ചു. ഗ്രാൻവിൽ ഗ്രാൻഡ് റോയലിൽ നടന്ന ഔദ്യോഗിക ഉദ്ഘാടന ചടങ്ങിൽ ജനപ്രതിനിധികളും വാണിജ്യ പ്രമുഖരും ജീവകാരുണ്യ പ്രവർത്തകരും പങ്കെടുത്തു. ഉദ്ഘാടന ചടങ്ങിന്റെ ഭാഗമായി നേപ്പാളിലെ പ്രളയബാധിതർക്കായി അരമണിക്കൂറിനുള്ളിൽ 90,000 ഡോളർ സമാഹരിച്ചതായി ഭാരവാഹികൾ അറിയിച്ചു.
ദുരന്തങ്ങൾ മുൻകൂട്ടി കണ്ട് സജ്ജമാകുക, കൃത്യസമയത്ത് അടിയന്തര സഹായങ്ങൾ എത്തിക്കുക, ദീർഘകാല പുനരധിവാസം സാധ്യമാക്കുക എന്നീ അഞ്ച് പ്രധാന ലക്ഷ്യങ്ങളെ മുൻനിർത്തിയാണ് ഫൗണ്ടേഷൻ പ്രവർത്തിക്കുന്നത്. കാട്ടുതീയും പ്രളയവും അടക്കമുള്ള പ്രകൃതിദുരന്തങ്ങൾ പതിവാകുന്ന ഓസ്ട്രേലിയൻ പശ്ചാത്തലത്തിൽ, വിവിധ സാമൂഹിക സംഘടനകളെയും വാണിജ്യ സ്ഥാപനങ്ങളെയും പ്രൊഫഷണലുകളെയും ഏകോപിപ്പിച്ച് ദുരന്തനിവാരണ പ്രവർത്തനങ്ങൾ കൂടുതൽ ഫലപ്രദമാക്കുകയാണ് സംഘടനയുടെ ലക്ഷ്യം.
സിഡ്നിയിലെ ഇന്ത്യൻ കോൺസൽ ജനറൽ ഡോ. എസ്. ജാനകിരാമൻ, ന്യൂ സൗത്ത് വെയിൽസ് പ്രീമിയർ ക്രിസ് മിൻസിനെ പ്രതിനിധീകരിച്ച് ഗ്രാൻവിൽ എം.പി. ജൂലിയ ഫിൻ, റിവർസ്റ്റോൺ എം.പി. വാറൻ കിർബി, ദി ഹിൽസ് ഷെയർ കൗൺസിൽ മേയർ ഡോ. മിഷേൽ ബൈൺ തുടങ്ങിയ വിശിഷ്ടാതിഥികൾ ചടങ്ങിൽ സന്നിഹിതരായിരുന്നു. ഓസ്ട്രേലിയൻ സെക്യൂരിറ്റീസ് എക്സ്ചേഞ്ച്, എ.ബി.സി. എന്നിവയുടെ മുൻ ചെയർമാൻ ഡോ. മോറിസ് ന്യൂമാൻ വീഡിയോ സന്ദേശത്തിലൂടെ ആശംസകൾ നേർന്നു.
ജഗദീഷ് ത്രിവേദി (ചെയർപേഴ്സൺ), സേവാ സിംഗ് (വൈസ് ചെയർപേഴ്സൺ), ജിഗീഷ് പുരോഹിത് (സെക്രട്ടറി), സമീർ മേത്ത (ട്രഷറർ), ശ്രീനിവാസ റാവു (ജോയിന്റ് സെക്രട്ടറി) എന്നിവരടങ്ങുന്നതാണ് സംഘടനയുടെ നേതൃനിര. ബ്രയാൻ ലാറ, മിച്ചൽ ജോൺസൺ തുടങ്ങിയ പ്രമുഖ ക്രിക്കറ്റ് താരങ്ങൾ ഒപ്പിട്ട സ്മരണികകളുടെയും പ്രമുഖ കലാകാരന്മാരുടെ ചിത്രങ്ങളുടെയും ലേലവും ചടങ്ങിനോടനുബന്ധിച്ച് നടന്നു.
