ലുധിയാന: ഓസ്‌ട്രേലിയയിൽ നിന്ന് നാട്ടിലെത്തി ദിവസങ്ങൾക്കകം ഭാര്യയെ അതിക്രൂരമായി കുത്തിക്കൊലപ്പെടുത്തിയ കേസിൽ 50-കാരനായ ഭർത്താവിനെ പഞ്ചാബ് പോലീസ് അറസ്റ്റ് ചെയ്തു. ലുധിയാന പഖോവൽ റോഡിലെ വികാസ് നഗറിൽ താമസിക്കുന്ന രവീന്ദർ സിംഗാണ് ഭാര്യ കമൽദീപ് കൗറിനെ (49) കൊലപ്പെടുത്തിയ കേസിൽ പിടിയിലായത്.
ദമ്പതികളുടെ ഇളയ മകൻ ഓസ്‌ട്രേലിയയിലാണ് താമസിക്കുന്നത്. ഇളയ മകനെ സന്ദർശിക്കാൻ ഇരുവരും ഓസ്‌ട്രേലിയയിലേക്ക് പോയിരുന്നു. ഏതാനും മാസങ്ങൾക്ക് മുൻപ് കമൽദീപ് കൗർ നാട്ടിൽ തിരിച്ചെത്തുകയും, ഒക്ടോബർ 29-ന് രവീന്ദർ സിംഗ് ഇന്ത്യയിലേക്ക് മടങ്ങിയെത്തുകയും ചെയ്തു. ഭാര്യയുടെ സ്വഭാവത്തിൽ സംശയം പ്രകടിപ്പിച്ച് ഇയാൾ നിരന്തരം വഴക്കിട്ടിരുന്നതായി കുടുംബാംഗങ്ങൾ മൊഴി നൽകിയിട്ടുണ്ട്.
ശനിയാഴ്ച രാത്രിയോടെ മൂത്ത മകനായ ഗഗൻദീപ് സിംഗിനെ സാധനങ്ങൾ വാങ്ങാനായി സമീപത്തെ മാർക്കറ്റിലേക്ക് പറഞ്ഞുവിട്ട ശേഷമായിരുന്നു ആസൂത്രിതമായ കൊലപാതകം. അടുക്കളയിൽ ഉപയോഗിക്കുന്ന കത്തി ഉപയോഗിച്ച് കമൽദീപിന്റെ നെഞ്ചിലും കഴുത്തിലും വയറിലുമായി ക്രൂരമായി കുത്തിപ്പരിക്കേൽപ്പിക്കുകയായിരുന്നു. തുടർന്ന് തെളിവ് നശിപ്പിക്കാനായി കത്തി കഴുകി വെച്ച ശേഷം പ്രതി സ്ഥലത്തുനിന്ന് കടന്നുകളഞ്ഞു.
കടയിൽ നിന്നും മടങ്ങിയെത്തിയ മൂത്ത മകനാണ് രക്തത്തിൽ കുളിച്ച നിലയിൽ അമ്മയെ കിടപ്പുമുറിയിൽ കണ്ടെത്തിയത്. ഉടൻ തന്നെ അയൽവാസികളുടെ സഹായത്തോടെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ദുഗ്രി പോലീസ് സ്ഥലത്തെത്തി നടത്തിയ അന്വേഷണത്തിനൊടുവിൽ പ്രതിയെ അറസ്റ്റ് ചെയ്യുകയും കൊലപാതകത്തിന് ഉപയോഗിച്ച ആയുധം കണ്ടെടുക്കുകയും ചെയ്തു. സംഭവത്തിൽ പോലീസ് സമഗ്രമായ അന്വേഷണം തുടരുകയാണ്.
(ഓസ്‌ട്രേലിയയിൽ ഗാർഹിക പീഡനങ്ങളോ അതിക്രമങ്ങളോ നേരിടുന്നവർക്ക് 1800RESPECT നമ്പറായ 1800 737 732 എന്നതിലും, അടിയന്തര സാഹചര്യങ്ങളിൽ 000 എന്ന നമ്പറിലും ബന്ധപ്പെടാവുന്നതാണ്.)
