വാഷിങ്ടൺ: 2026ലെ അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കേറ്റ കനത്ത തിരിച്ചടിക്കു പിന്നാലെ തോൽവിയുടെ ഉത്തരവാദിത്വം ഏറ്റെടുക്കാതെ പ്രസിഡന്റ് ഡോണൾഡ് ട്രംപ്. തിരഞ്ഞെടുപ്പ് ഫലത്തെക്കുറിച്ചുള്ള ചോദ്യങ്ങളിൽനിന്ന് ശ്രദ്ധ തിരിച്ച് വൈറ്റ് ഹൗസിൽ നിർമിക്കുന്ന പുതിയ ബാൾറൂമിന്റെ വിശേഷങ്ങൾ വിവരിക്കാനാണ് ട്രംപ് കൂടുതൽ സമയം ചെലവഴിച്ചത്. ഏകദേശം 41 മിനിറ്റ് നീണ്ട വാർത്താസമ്മേളനത്തിൽ തിരഞ്ഞെടുപ്പിലെ തോൽവിയെക്കുറിച്ച് കാര്യമായ പ്രതികരണം നടത്തിയില്ല.
നവംബർ മൂന്നിന് നടന്ന ഇടക്കാല തിരഞ്ഞെടുപ്പിൽ ഡെമോക്രാറ്റിക് പാർട്ടി ജനപ്രതിനിധിസഭയിലും സെനറ്റിലും ഭൂരിപക്ഷം നേടി. റിപ്പബ്ലിക്കൻ പാർട്ടിയുടെ പരാജയം ട്രംപ് ഭരണകൂടത്തിന് വലിയ രാഷ്ട്രീയ തിരിച്ചടിയായാണ് വിലയിരുത്തപ്പെടുന്നത്. ടെക്സസ്, സൗത്ത് കരോലൈന തുടങ്ങിയ റിപ്പബ്ലിക്കൻ സ്വാധീനമുള്ള സംസ്ഥാനങ്ങളിലടക്കം ഡെമോക്രാറ്റുകൾ നിർണായക മുന്നേറ്റം നടത്തി.
വൈറ്റ് ഹൗസിലെ ഈസ്റ്റ് വിങ് പൊളിച്ചുനീക്കി നിർമിക്കുന്ന ബാൾറൂമിന്റെ നിർമാണസ്ഥലത്തായിരുന്നു ട്രംപിന്റെ വാർത്താസമ്മേളനം. കെട്ടിടത്തിന്റെ രൂപകൽപ്പന, നിർമാണത്തിനുപയോഗിക്കുന്ന വസ്തുക്കൾ, സുരക്ഷാ സംവിധാനങ്ങൾ, മാർബിൾ തറ, അലങ്കാര വിളക്കുകൾ തുടങ്ങിയവയെക്കുറിച്ച് അദ്ദേഹം വിശദീകരിച്ചു. പദ്ധതിയെ അമേരിക്കയുടെ അഭിമാനവുമായി ബന്ധപ്പെടുത്തുകയും ചെയ്തു.
തിരഞ്ഞെടുപ്പിലെ തോൽവിയുടെ ഉത്തരവാദിത്വം തനിക്കല്ലെന്ന നിലപാടാണ് ട്രംപ് സ്വീകരിച്ചത്. താൻ ബാലറ്റിൽ ഉണ്ടായിരുന്നില്ലെന്നും സ്ഥാനാർഥികളാണ് പരാജയത്തിന് ഉത്തരവാദികളെന്നും അദ്ദേഹം നേരത്തേ പ്രതികരിച്ചിരുന്നു. റിപ്പബ്ലിക്കൻ സ്ഥാനാർഥികൾ വോട്ടർമാരെ ആകർഷിക്കുന്നതിൽ പരാജയപ്പെട്ടെന്നും അദ്ദേഹം കുറ്റപ്പെടുത്തി. ഫോക്സ് ന്യൂസ് ഉൾപ്പെടെയുള്ള മാധ്യമങ്ങളെയും വിമർശിച്ചു.
ഇറാനുമായുള്ള യുദ്ധവും ഇന്ധനവില വർധനയും തിരഞ്ഞെടുപ്പിലെ തിരിച്ചടിക്ക് കാരണമായെന്ന് ട്രംപ് ഭാഗികമായി സമ്മതിച്ചിട്ടുണ്ട്. എന്നാൽ തന്റെ നയങ്ങൾ തെറ്റായിരുന്നില്ലെന്ന നിലപാടിൽ അദ്ദേഹം ഉറച്ചുനിന്നു. ഡെമോക്രാറ്റുകളുമായി സഹകരിക്കാൻ തയ്യാറാണെന്ന് അറിയിച്ചെങ്കിലും തനിക്കെതിരായ നിലപാടിലുള്ള ബില്ലുകൾ വീറ്റോ ചെയ്യുമെന്നും മുന്നറിയിപ്പ് നൽകി.
റിപ്പബ്ലിക്കൻ പാർട്ടിക്ക് കോൺഗ്രസിലെ ഇരുസഭകളിലുമുണ്ടായിരുന്ന നിയന്ത്രണം നഷ്ടമായതോടെ ട്രംപിന്റെ ശേഷിക്കുന്ന ഭരണകാലത്ത് നിയമനിർമാണവും ഭരണനയങ്ങളും നടപ്പാക്കുന്നതിൽ കൂടുതൽ പ്രതിസന്ധികൾ നേരിടേണ്ടിവരുമെന്നാണ് രാഷ്ട്രീയ നിരീക്ഷണം.
