ചെന്നൈ: നടനും മക്കൾ നീതി മയ്യം (എംഎൻഎം) അധ്യക്ഷനുമായ കമൽഹാസന്റെ 72-ാം പിറന്നാൾ ആഘോഷമാക്കി ആരാധകരും സിനിമാ താരങ്ങളും രാഷ്ട്രീയ നേതാക്കളും. നവംബർ ഏഴിനായിരുന്നു പിറന്നാൾ. സമൂഹമാധ്യമങ്ങളിലൂടെ നിരവധി പേരാണ് താരത്തിന് ആശംസകൾ നേർന്നത്.
മലയാളത്തിന്റെ സൂപ്പർതാരങ്ങളായ മമ്മൂട്ടിയും മോഹൻലാലും കമൽഹാസന് ആശംസകൾ അറിയിച്ചു. ഇന്ത്യൻ സിനിമയ്ക്ക് നൽകിയ സംഭാവനകളെ പ്രകീർത്തിച്ച മമ്മൂട്ടി അദ്ദേഹത്തിന് ആരോഗ്യവും സന്തോഷവും നേർന്നു. കമൽഹാസന്റെ അസാധാരണമായ പ്രതിഭ തലമുറകൾക്ക് പ്രചോദനമാകട്ടെയെന്ന് മോഹൻലാലും ആശംസിച്ചു.
കേരള മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും കമൽഹാസന് പിറന്നാൾ ആശംസകൾ നേർന്നു. ഇന്ത്യൻ സിനിമയെ സമ്പന്നമാക്കിയ പ്രതിഭാശാലിയായ കലാകാരനാണ് കമൽഹാസനെന്ന് പിണറായി വിജയൻ വിശേഷിപ്പിച്ചു. മതനിരപേക്ഷത, മാനവികത, പുരോഗമന മൂല്യങ്ങൾ എന്നിവയോടുള്ള അദ്ദേഹത്തിന്റെ പ്രതിബദ്ധതയെയും പിണറായി പ്രശംസിച്ചു. കേരളം കമൽഹാസനെ അതിഥിയായല്ല, സ്വന്തം സിനിമാ-സാംസ്കാരിക ലോകത്തിന്റെ ഭാഗമായാണ് കാണുന്നതെന്ന് വി.ഡി. സതീശൻ കുറിച്ചു.
തമിഴ്നാട് മുഖ്യമന്ത്രി ജോസഫ് വിജയ്, ഡിഎംകെ അധ്യക്ഷൻ എം.കെ. സ്റ്റാലിൻ, ലോക്സഭാ സ്പീക്കർ ഓം ബിർള തുടങ്ങിയവരും ആശംസകൾ അറിയിച്ചു. സിനിമയിലും പൊതുജീവിതത്തിലും കൂടുതൽ നേട്ടങ്ങൾ കൈവരിക്കട്ടെയെന്ന് വിജയ് ആശംസിച്ചു.
മക്കളായ ശ്രുതി ഹാസനും അക്ഷര ഹാസനും പിതാവിനൊപ്പമുള്ള ചിത്രങ്ങൾ പങ്കുവച്ചാണ് ആശംസകൾ അറിയിച്ചത്. അച്ഛൻ, സുഹൃത്ത്, പ്രചോദനം എന്നീ നിലകളിൽ കമൽഹാസനുള്ള സ്ഥാനത്തെക്കുറിച്ചായിരുന്നു അക്ഷരയുടെ കുറിപ്പ്.
പിറന്നാൾ ദിനത്തിൽ കമൽഹാസൻ നായകനാകുന്ന പുതിയ ചിത്രത്തിന്റെ പേരും പ്രഖ്യാപിച്ചു. എസ്.യു. അരുണ്‍കുമാർ സംവിധാനം ചെയ്യുന്ന ചിത്രത്തിന് ‘സണ്ടിയാർ’ എന്നാണ് പേരിട്ടിരിക്കുന്നത്. അനിരുദ്ധ് രവിചന്ദറാണ് സംഗീതസംവിധാനം. ചിത്രത്തിന്റെ ചിത്രീകരണവും പിറന്നാൾ ദിനത്തിൽ ആരംഭിച്ചു.
ബാലതാരമായി സിനിമയിലെത്തിയ കമൽഹാസൻ ആറു പതിറ്റാണ്ടിലേറെയായി ഇന്ത്യൻ സിനിമയിലെ സജീവ സാന്നിധ്യമാണ്. നടൻ, സംവിധായകൻ, നിർമാതാവ്, തിരക്കഥാകൃത്ത് എന്നീ നിലകളിൽ ശ്രദ്ധേയനായ അദ്ദേഹം രാജ്യസഭാംഗം കൂടിയാണ്.
