ടെഹ്‌റാൻ: ഹോർമുസ് കടലിടുക്കിലെ തന്ത്രപ്രധാനമായ ഇറാന്റെ ഖെഷ്‌ം ദ്വീപിലേക്ക് അമേരിക്കൻ സൈന്യം പ്രൊജക്ടൈൽ ആക്രമണം നടത്തിയതായി ഇറാനിയൻ ഔദ്യോഗിക മാധ്യമങ്ങൾ. ഞായറാഴ്ച രാത്രിയായിരുന്നു ആക്രമണമെന്നാണ് റിപ്പോർട്ട്. ദ്വീപിലെ നാലിടങ്ങളിൽ സ്ഫോടനങ്ങളുണ്ടായതായും റിപ്പോർട്ടുകളുണ്ട്.
ഇറാനിലെ ഹോർമോസ്ഗാൻ പ്രവിശ്യയിലെ ബന്ദർ അബ്ബാസ്, സിറിക് തുടങ്ങിയ നഗരങ്ങളിലും സ്ഫോടനശബ്ദങ്ങൾ കേട്ടതായി റിപ്പോർട്ടുകളുണ്ട്. ഹോർമുസ് കടലിടുക്കിൽ ഇറാൻ സൈന്യം നടത്തിയ പ്രതിരോധ നീക്കങ്ങളുമായി ബന്ധപ്പെട്ടാണ് ഈ സ്ഫോടനങ്ങളെന്നാണ് ചില റിപ്പോർട്ടുകൾ വ്യക്തമാക്കുന്നത്.
ഇറാൻ വിദേശകാര്യ മന്ത്രി അബ്ബാസ് അരാഗ്ചി, യുദ്ധം വീണ്ടും ആരംഭിച്ചാൽ അമേരിക്കയ്ക്ക് കനത്ത തിരിച്ചടി നൽകുമെന്ന് മുന്നറിയിപ്പ് നൽകി. അതേസമയം, ഇറാന്റെ ആണവപദ്ധതിയും ഹോർമുസ് കടലിടുക്ക് വീണ്ടും തുറക്കുന്നതും സംബന്ധിച്ച ചർച്ചകളിൽ പുരോഗതിയുണ്ടായാൽ ആക്രമണം ഒഴിവാക്കാൻ സാധ്യതയുണ്ടെന്ന് അമേരിക്കൻ പ്രസിഡന്റ് ഡോണൾഡ് ട്രംപ് സൂചിപ്പിച്ചു.
അമേരിക്കയിലെ ഇടക്കാല തിരഞ്ഞെടുപ്പ് ഫലങ്ങൾ പുറത്തുവന്നതോടെ വാഷിങ്ടണുമായുള്ള സമാധാന ചർച്ചകൾ നിലച്ചിരിക്കുകയാണെന്ന് അരാഗ്ചി പറഞ്ഞു. മേഖലയിലെ സാഹചര്യം ശാന്തമായാൽ മാത്രമേ മധ്യസ്ഥ ചർച്ചകൾ പുനരാരംഭിക്കാൻ കഴിയൂവെന്നും അദ്ദേഹം വ്യക്തമാക്കി.
എന്നാൽ ഖെഷ്‌ം ദ്വീപിലെ സ്ഫോടനങ്ങൾ അമേരിക്കൻ ആക്രമണത്തിന്റെ ഫലമാണെന്ന് സ്ഥിരീകരിക്കുന്ന ഔദ്യോഗിക വിവരങ്ങൾ ലഭ്യമായിട്ടില്ല. സ്ഫോടനങ്ങൾ ഇറാന്റെ സൈനിക നീക്കങ്ങളുമായി ബന്ധപ്പെട്ടതാകാമെന്നാണ് ഇറാനിയൻ സ്റ്റേറ്റ് ടെലിവിഷൻ നേരത്തേ വ്യക്തമാക്കിയത്. സ്ഫോടനങ്ങളുടെ കാരണം സ്ഥിരീകരിക്കാനായിട്ടില്ലെന്ന് റോയിട്ടേഴ്സും റിപ്പോർട്ട് ചെയ്തു.
ഹോർമുസ് കടലിടുക്കിലെ സംഘർഷാവസ്ഥ തുടരുന്നതിനിടെ അമേരിക്കയും ഇറാനും തമ്മിലുള്ള സൈനിക ഏറ്റുമുട്ടൽ വീണ്ടും ശക്തമാകുമോ എന്ന ആശങ്കയും നിലനിൽക്കുകയാണ്.
