മെൽബൺ: വാഹനം ലോഡിങ് സോണിൽ പാർക്ക് ചെയ്ത് ക്യാമറ ഉപകരണങ്ങൾ ഇറക്കിയതിന് പിഴ ചുമത്തിയ മെൽബൺ സിറ്റി കൗൺസിലിന്റെ വിചിത്രമായ നടപടിക്കെതിരെ കടുത്ത പ്രതിഷേധവുമായി മെൽബണിലെ കൊമേഡിയനും വീഡിയോഗ്രാഫറുമായ അലക്സ് ലോവെസ്. ജോലിയുടെ ഭാഗമായി നിശ്ചിത ആവശ്യത്തിന് മാത്രമാണ് സ്ഥലം ഉപയോഗിച്ചതെങ്കിലും അധികൃതർ പിഴ ഒഴിവാക്കാൻ തയ്യാറായില്ലെന്ന് അദ്ദേഹം ആരോപിച്ചു.
മെൽബൺ സിബിഡിയിലെ ടൗൺ ഹാളിൽ വെച്ച് ലോർഡ് മേയർ നിക്കോളാസ് റീസിന്റെ പ്രസംഗം ചിത്രീകരിക്കാനുള്ള ചുമതലയായിരുന്നു അലക്സിന് ഉണ്ടായിരുന്നത്. കനത്ത ഭാരമുള്ള ക്യാമറ ഉപകരണങ്ങളും അനുബന്ധ സാമഗ്രികളും വേഗത്തിൽ കാറിൽ നിന്ന് പുറത്തിറക്കുന്നതിനാണ് ടൗൺ ഹാളിന് സമീപമുള്ള ലോഡിങ് സോണിലേക്ക് അദ്ദേഹം വാഹനം മാറ്റിയത്. എന്നാൽ സാധനങ്ങൾ ഇറക്കാൻ എടുത്ത പത്ത് മിനിറ്റോളം വരുന്ന സമയത്തിനുള്ളിൽ കാറിന്റെ വിൻഡ്സ്ക്രീനിൽ 204 ഡോളറിന്റെ പിഴ നോട്ടീസ് പതിക്കുകയായിരുന്നു.
താൻ ജോലി ആവശ്യത്തിനാണ് എത്തിയതെന്നും സാധനങ്ങൾ ഇറക്കാനുള്ള ചുരുങ്ങിയ സമയം മാത്രമാണ് വാഹനം പാർക്ക് ചെയ്തതെന്നും ലോവെസ് കൗൺസിലിന് നൽകിയ അപ്പീലിൽ വ്യക്തമാക്കി. തനിക്ക് കടുത്ത നടുവേദനയുള്ളതിനാൽ ഭാരമേറിയ ഉപകരണങ്ങൾ ദൂരത്തേക്ക് ചുമന്നുകൊണ്ടുപോകാൻ സാധിക്കില്ലെന്നും അദ്ദേഹം കൗൺസിലിനെ അറിയിച്ചു. എന്നാൽ, ലോവെസിന്റെ വിശദീകരണം തള്ളിക്കളഞ്ഞ മെൽബൺ സിറ്റി കൗൺസിൽ പിഴത്തുക നിലനിർത്തുകയാണുണ്ടായത്.
സാധനങ്ങൾ കയറ്റുകയോ ഇറക്കുകയോ ചെയ്താലും ഒരു സാധാരണ യാത്രാ വാഹനം ലോഡിങ് സോണിൽ നിർത്താൻ അനുവാദമില്ലെന്നതാണ് കൗൺസിൽ നൽകിയ വിശദീകരണം. വിക്ടോറിയയിലെ റോഡ് സുരക്ഷാ ചട്ടങ്ങളിലെ റൂൾ 179 പ്രകാരം, ലോഡിങ് സോണുകളിൽ വാഹനം നിർത്താൻ വാനുകളോ അല്ലെങ്കിൽ ഇരുവശത്തും സ്ഥിരമായി ബോർഡുകൾ പതിപ്പിച്ച വാണിജ്യ യാത്രാ വാഹനങ്ങളോ ആയിരിക്കണം.
താൻ പാർട്ട് ടൈമായാണ് വീഡിയോഗ്രഫി ജോലികൾ ചെയ്യുന്നതെന്നും പ്രത്യേകമായി ഒരു വാൻ വാങ്ങാനോ കാറിൽ സ്ഥിരമായി വാണിജ്യ ലേബലുകൾ പതിപ്പിക്കാനോ ഉള്ള സാമ്പത്തിക ശേഷി പല തുടക്കക്കാർക്കും ഉണ്ടാകില്ലെന്നും ലോവെസ് ചൂണ്ടിക്കാട്ടി. ഇത്തരം അനാവശ്യവും സങ്കീർണ്ണവുമായ നിയമങ്ങൾ വളർന്നുവരുന്ന കലാകാരന്മാരുടെ ജീവിതം ദുസ്സഹമാക്കുകയാണെന്നും അദ്ദേഹം കൂട്ടിച്ചേർത്തു. വിഷയത്തിൽ മെൽബൺ സിറ്റി കൗൺസിലിന്റെയും ഗതാഗത വകുപ്പിന്റെയും ഔദ്യോഗിക പ്രതികരണത്തിനായി മാധ്യമങ്ങൾ സമീപിച്ചിട്ടുണ്ട്.
