സിഡ്‌നി: ഓസ്‌ട്രേലിയയിലെ ലേബർ പാർട്ടിയുടെ സാമ്പത്തിക നയങ്ങൾ ഇൻഡോ-ഓസ്‌ട്രേലിയൻ സമൂഹത്തിന്റെ പ്രതീക്ഷകൾക്കും സ്വപ്നങ്ങൾക്കും വലിയ ഭീഷണിയുയർത്തുന്നതായി പ്രതിപക്ഷ സെനറ്ററും ഷാഡോ അസിസ്റ്റന്റ് മിനിസ്റ്ററുമായ ഡേവ് ശർമ്മ വ്യക്തമാക്കി. കഠിനാധ്വാനത്തിലൂടെയും സംരംഭകത്വത്തിലൂടെയും മികച്ചൊരു ജീവിതം കെട്ടിപ്പടുക്കാമെന്ന വിശ്വാസത്തിലാണ് ഇൻഡോ-ഓസ്‌ട്രേലിയൻ സമൂഹം രാജ്യത്തേക്ക് കുടിയേറിയത്. എന്നാൽ നിലവിലെ സർക്കാരിന്റെ തെറ്റായ സാമ്പത്തിക നയങ്ങൾ മൂലം ഈ പ്രതീക്ഷകൾ കടുത്ത സമ്മർദ്ദത്തിലാണെന്ന് അദ്ദേഹം പറഞ്ഞു.
ലേബർ സർക്കാർ അധികാരത്തിൽ വന്നതിനു ശേഷം ഓസ്‌ട്രേലിയൻ റിസർവ് ബാങ്ക് 17 തവണയാണ് പലിശ നിരക്ക് വർദ്ധിപ്പിച്ചത്. സർക്കാരിന്റെ അനിയന്ത്രിതമായ ചെലവഴിക്കലാണ് പണപ്പെരുപ്പം ഉയർന്ന നിലയിൽ തുടരാൻ കാരണമെന്നും, ലോകത്തിലെ മറ്റ് വികസിത രാജ്യങ്ങളിൽ എവിടെയും ഈ വർഷം അഞ്ച് തവണ പലിശ നിരക്ക് ഉയർത്തിയിട്ടില്ലെന്നും അദ്ദേഹം ചൂണ്ടിക്കാണിച്ചു.
ഉയർന്ന പലിശ നിരക്കുകൾ മൂലം ഭവനവായ്പാ തിരിച്ചടവ്, പലചരക്ക് സാധനങ്ങൾ, വൈദ്യുതി ബില്ലുകൾ എന്നിവ കുത്തനെ കൂടിയത് സാധാരണ കുടുംബങ്ങളുടെ ജീവിതച്ചെലവ് വർദ്ധിപ്പിച്ചു. ചെറുകിട ബിസിനസ്സ് മേഖലയിൽ സജീവമായ ഇൻഡോ-ഓസ്‌ട്രേലിയക്കാർക്ക് ഉയർന്ന കടമെടുപ്പ് ചെലവുകൾ മൂലം പുതിയ ജീവനക്കാരെ നിയമിക്കാനും ബിസിനസ്സ് വിപുലീകരിക്കാനും കടുത്ത ബുദ്ധിമുട്ട് നേരിടുന്നുണ്ട്.
രാജ്യത്ത് സാമ്പത്തിക അച്ചടക്കം പുനഃസ്ഥാപിക്കാനും അനാവശ്യ നിയന്ത്രണങ്ങൾ നീക്കാനും വീടുകളുടെ നിർമ്മാണം വേഗത്തിലാക്കാനുമാണ് ലിബറൽ പാർട്ടി ലക്ഷ്യമിടുന്നത്. തങ്ങൾ അധികാരത്തിൽ വന്നാൽ ലേബർ സർക്കാർ ഏർപ്പെടുത്തിയ പുതിയ നികുതികൾ റദ്ദാക്കുമെന്നും രാജ്യത്ത് സാമ്പത്തിക ഭദ്രത ഉറപ്പാക്കുമെന്നും സെനറ്റർ ഡേവ് ശർമ്മ കൂട്ടിച്ചേർത്തു.
