മെൽബൺ: മെൽബൺ വിമാനത്താവളത്തിൽ നിന്ന് വീട്ടിലേക്ക് മടങ്ങുന്നതിനിടെ ഊബർ ഡ്രൈവർ വാഹനമോടിച്ചുകൊണ്ട് ഫോണിൽ ടിക് ടോക് ഉപയോഗിച്ചതിന്റെ ദൃശ്യങ്ങൾ പകർത്തി 20-കാരനായ യാത്രക്കാരൻ. ഫ്രീവേയിലൂടെ സഞ്ചരിക്കുമ്പോൾ കാർ ദിശതെറ്റി നീങ്ങുന്നത് ശ്രദ്ധയിൽപ്പെട്ടതോടെയാണ് ഡ്രൈവർ ടിക് ടോക് സ്ക്രോൾ ചെയ്യുന്നത് ജാക്ക് സാവിൽ എന്ന യുവാവ് കണ്ടത്. ഉടൻ തന്നെ സാവിൽ ഈ ദൃശ്യങ്ങൾ മൊബൈലിൽ പകർത്തുകയും ഡ്രൈവറോട് ഇതേക്കുറിച്ച് ചോദിക്കുകയും ചെയ്തു. എന്നാൽ തന്റെ സുരക്ഷാ ആശങ്കകൾ ഡ്രൈവർ ചിരിച്ചുതള്ളുകയായിരുന്നുവെന്ന് സാവിൽ പറഞ്ഞു.
യാത്രയിലുടനീളം തനിക്ക് വലിയ സുരക്ഷാഭീഷണി തോന്നിയതായി സാവിൽ വ്യക്തമാക്കി. താൻ ഇടപെട്ടതിനെത്തുടർന്ന് ഡ്രൈവർ ടിക് ടോക് ഉപയോഗം നിർത്തിയെങ്കിലും, യാത്ര അവസാനിക്കുന്നതുവരെ ഫോണിലെ മറ്റ് ആപ്പുകൾ ഉപയോഗിക്കുന്നത് തുടർന്നതായും അദ്ദേഹം ആരോപിച്ചു. ആറുമാസം മുൻപ് മറ്റൊരു ഊബർ യാത്രയ്ക്കിടെ വാഹനം നിർത്തിയിട്ടിരുന്ന കാറിലിടിച്ചുണ്ടായ അപകടത്തിൽ സാവിലിന് നിസ്സാര പരിക്കേറ്റിരുന്നു. ഇതിന് പിന്നാലെയാണ് പുതിയ ദുരനുഭവം ഉണ്ടായിരിക്കുന്നത്.
സംഭവത്തെത്തുടർന്ന് ബന്ധപ്പെട്ട ഡ്രൈവറുടെ അക്കൗണ്ട് പരിശോധിക്കുമെന്ന് ഊബർ അധികൃതർ സ്ഥിരീകരിച്ചു. പണം നൽകി യാത്ര ചെയ്യുന്നവർ റോഡിലേക്ക് ശ്രദ്ധിക്കാൻ ഡ്രൈവറെ ഓർമ്മിപ്പിക്കേണ്ട സാഹചര്യം ഒരിക്കലും ഉണ്ടാകരുതെന്നും, സുരക്ഷിതമായി ലക്ഷ്യസ്ഥാനത്ത് എത്താൻ എല്ലാവർക്കും അവകാശമുണ്ടെന്നും റിപ്പോർട്ട് ചൂണ്ടിക്കാട്ടുന്നു. യാത്രക്കാരുമായി പോകുമ്പോൾ വീഡിയോകൾ കണ്ട് വാഹനമോടിക്കുന്ന റൈഡ്-ഷെയർ ഡ്രൈവർമാർക്ക് പ്ലാറ്റ്‌ഫോമിൽ നിന്ന് സ്ഥിരവിലക്ക് ഏർപ്പെടുത്തണമോ എന്ന ചർച്ചയും ഈ സംഭവത്തോടെ സജീവമായിട്ടുണ്ട്.
