ചെന്നൈ: ഇന്ത്യൻ പ്രീമിയർ ലീഗിലെ (ഐപിഎൽ) കളിക്കാരനെന്ന നിലയിലുള്ള കരിയറിന് വിരാമമിട്ട് മുൻ ഇന്ത്യൻ നായകൻ മഹേന്ദ്രസിങ് ധോണി. 2027 സീസൺ മുതൽ ചെന്നൈ സൂപ്പർ കിങ്സിന്റെ (സിഎസ്കെ) മെന്ററായി പ്രവർത്തിക്കും. ചൊവ്വാഴ്ചയാണ് (നവംബർ 17) ഫ്രാഞ്ചൈസി ഇക്കാര്യം ഔദ്യോഗികമായി അറിയിച്ചത്.
ഐപിഎല്ലിന്റെ പ്രഥമ സീസണായ 2008 മുതൽ ചെന്നൈ ടീമിന്റെ മുഖമായിരുന്ന 45-കാരനായ ധോണി, 2026 സീസണിൽ പരിക്കിനെത്തുടർന്ന് ഒരു മത്സരത്തിൽപ്പോലും കളിച്ചിരുന്നില്ല. കാൽവണ്ണയ്ക്കേറ്റ പരിക്കാണ് സീസണിൽനിന്ന് വിട്ടുനിൽക്കാൻ കാരണമായത്. കളിക്കാരനെന്ന നിലയിൽ ടീമിന് മികച്ച സംഭാവന നൽകാൻ കഴിയില്ലെന്ന് തോന്നിയാൽ മാറിനിൽക്കാമെന്ന നിലപാടാണ് ധോണി സ്വീകരിച്ചതെന്ന് സിഎസ്കെ ഉടമ റൂപ ഗുരുനാഥ് വ്യക്തമാക്കി.
ടീമിന്റെ നിലനിർത്തൽ പട്ടിക സംബന്ധിച്ച് മാനേജ്മെന്റുമായി നടത്തിയ ചർച്ചയ്ക്കിടെ തന്റെ പേരും ഒഴിവാക്കേണ്ടവരുടെ പട്ടികയിൽ ഉൾപ്പെടുത്തണമെന്ന് ധോണി നിർദേശിക്കുകയായിരുന്നു. തീരുമാനം ടീമിന് വൈകാരികമായ നിമിഷമായിരുന്നുവെന്നും റൂപ ഗുരുനാഥ് പറഞ്ഞു.
2008 മുതൽ ഐപിഎല്ലിൽ കളിച്ച ധോണി ചെന്നൈ സൂപ്പർ കിങ്സിനെ അഞ്ച് തവണ കിരീടത്തിലേക്ക് നയിച്ചു. 2010, 2011, 2018, 2021, 2023 വർഷങ്ങളിലായിരുന്നു കിരീടനേട്ടം. രണ്ട് ചാമ്പ്യൻസ് ലീഗ് ട്വന്റി20 കിരീടങ്ങളും ടീമിന് നേടിക്കൊടുത്തു. 2022-ൽ ക്യാപ്റ്റൻ സ്ഥാനം രവീന്ദ്ര ജഡേജയ്ക്ക് കൈമാറിയെങ്കിലും പിന്നീട് ധോണി വീണ്ടും നായകസ്ഥാനം ഏറ്റെടുത്തിരുന്നു. 2024 മുതൽ ഋതുരാജ് ഗെയ്ക്വാദാണ് ടീമിനെ നയിക്കുന്നത്.
ഐപിഎല്ലിൽ ആകെ 278 മത്സരങ്ങളിൽനിന്ന് 5,439 റൺസാണ് ധോണിയുടെ സമ്പാദ്യം. 24 അർധസെഞ്ചുറികളും നേടിയിട്ടുണ്ട്. ചെന്നൈയ്ക്കായി 272 മത്സരങ്ങളിൽ കളിച്ച് 5,314 റൺസ് നേടി. വിക്കറ്റ് കീപ്പറെന്ന നിലയിലും ക്യാപ്റ്റനെന്ന നിലയിലും ടൂർണമെന്റിൽ ശ്രദ്ധേയ റെക്കോർഡുകൾ ധോണിക്കുണ്ട്.
ഇന്ത്യൻ ടീമിന്റെ നായകനെന്ന നിലയിൽ 2007-ലെ ട്വന്റി20 ലോകകപ്പും 2011-ലെ ഏകദിന ലോകകപ്പും 2013-ലെ ചാമ്പ്യൻസ് ട്രോഫിയും ധോണി സ്വന്തമാക്കിയിട്ടുണ്ട്. 2020 ഓഗസ്റ്റ് 15-നാണ് അന്താരാഷ്ട്ര ക്രിക്കറ്റിൽനിന്ന് വിരമിക്കൽ പ്രഖ്യാപിച്ചത്. ഐപിഎല്ലിൽനിന്നുള്ള വിരമിക്കലോടെ കളിക്കാരനെന്ന നിലയിലുള്ള അദ്ദേഹത്തിന്റെ ക്രിക്കറ്റ് കരിയറിനും പൂർണവിരാമമാകുകയാണ്.

