മുൻ ലോകചാമ്പ്യനെ വീഴ്ത്തി; ഹോങ്കോങ് ഓപ്പൺ സെമിയിൽ ലക്ഷ്യ സെൻ

വിക്ടോറിയ: ഹോങ്കോങ് ഓപ്പൺ ബാഡ്മിന്റൺ ടൂർണമെന്റിൽ ഇന്ത്യൻ താരം ലക്ഷ്യ സെൻ സെമിഫൈനലിൽ പ്രവേശിച്ചു. ക്വാർട്ടർ ഫൈനലിൽ സിംഗപ്പൂരിന്റെ മുൻ ലോകചാമ്പ്യൻ ലോ കിൻ യൂവിനെ തോൽപ്പിച്ചാണ് ലക്ഷ്യ അവസാന നാലിൽ ഇടം നേടിയത്. സ്കോർ: 21-17, 10-21, 21-13.

ആദ്യ ഗെയിം സ്വന്തമാക്കിയ ലക്ഷ്യയ്ക്ക് രണ്ടാം ഗെയിമിൽ തിരിച്ചടി നേരിട്ടു. ശക്തമായി തിരിച്ചുവന്ന ലോ കിൻ യൂ 21-10ന് ഗെയിം നേടി മത്സരം നിർണായകമായ മൂന്നാം ഗെയിമിലേക്ക് നീട്ടി. എന്നാൽ മൂന്നാം ഗെയിമിൽ മികച്ച പ്രകടനം പുറത്തെടുത്ത ലക്ഷ്യ 21-13ന് വിജയിച്ച് സെമിഫൈനൽ ഉറപ്പിച്ചു.

2021ലെ ലോകചാമ്പ്യനാണ് ലോ കിൻ യൂ. ഇരുവരും തമ്മിലുള്ള 13-ാം ഏറ്റുമുട്ടലിൽ ലക്ഷ്യയുടെ എട്ടാം വിജയമാണിത്. തുടർച്ചയായ 13-ാം വിജയവും ഇതോടെ ലക്ഷ്യ സ്വന്തമാക്കി.

ഡെൻമാർക്കിന്റെ ആൻഡേഴ്‌സ് ആന്റൺസണും ചൈനയുടെ ഷു ഷുവാൻ ചെനും തമ്മിലുള്ള ക്വാർട്ടർ ഫൈനൽ വിജയിയെയാണ് ലക്ഷ്യ സെമിയിൽ നേരിടുക.

ജർമനിയിൽ നടന്ന ഹൈലോ ഓപ്പണിലും ജപ്പാൻ മാസ്റ്റേഴ്‌സിലും കിരീടം നേടിയ ലക്ഷ്യയുടെ തുടർച്ചയായ മൂന്നാം കിരീടമാണ് ഹോങ്കോങ്ങിൽ ലക്ഷ്യമിടുന്നത്. ഈ വിജയത്തോടെ ഡിസംബർ 9 മുതൽ 13 വരെ ചൈനയിലെ ഹാങ്ചൗവിൽ നടക്കുന്ന ബിഡബ്ല്യുഎഫ് വേൾഡ് ടൂർ ഫൈനൽസിലേക്കുള്ള യോഗ്യതയും ലക്ഷ്യ ഉറപ്പാക്കിയിട്ടുണ്ട്.

Leave a Reply

Your email address will not be published. Required fields are marked *