ഇസ്രയേലിൽ സർക്കാർ രൂപീകരണത്തിന് പുതിയ നീക്കം; നെതന്യാഹുവിന്റെ ലിക്കുഡ് പാർട്ടിയെ ചർച്ചയ്ക്ക് ക്ഷണിച്ച് ഗാഡി ഐസൻകോട്

ജെറുസലേം: ഇസ്രയേലിൽ പുതിയ സർക്കാർ രൂപീകരിക്കാനുള്ള ശ്രമങ്ങളുടെ ഭാഗമായി മുൻ സൈനിക മേധാവിയും സർക്കാർ രൂപീകരണത്തിന് നിയോഗിക്കപ്പെട്ട നേതാവുമായ ഗാഡി ഐസൻകോട് പ്രധാനമന്ത്രി ബെഞ്ചമിൻ നെതന്യാഹുവിന്റെ ലിക്കുഡ് പാർട്ടിയെ സഖ്യചർച്ചകൾക്ക് ക്ഷണിച്ചു. രാജ്യത്ത് വിശാലമായ ഐക്യസർക്കാർ രൂപീകരിക്കാനുള്ള നീക്കത്തിന്റെ ഭാഗമായാണ് ഞായറാഴ്ച മുതൽ ചർച്ചകൾ നടത്താൻ തീരുമാനിച്ചിരിക്കുന്നത്.

ഐസൻകോടിന്റെ മധ്യനിലപാടുള്ള യഷാർ പാർട്ടിയാണ് ഇക്കാര്യം അറിയിച്ചത്. പുതിയ സർക്കാർ രൂപീകരിക്കുന്നതിനുള്ള എല്ലാ സാധ്യതകളും പരിശോധിക്കുമെന്നും സാധ്യമായ ഏറ്റവും വിശാലമായ സർക്കാർ രൂപീകരിക്കുകയാണ് ലക്ഷ്യമെന്നും പാർട്ടി പ്രസ്താവനയിൽ വ്യക്തമാക്കി. ലിക്കുഡുമായി നേരത്തെ നടത്തിയ ആദ്യഘട്ട ചർച്ചകളിൽ ധാരണയിലെത്താൻ കഴിഞ്ഞിരുന്നില്ല. തുടർന്നാണ് കൂടുതൽ വിപുലമായ ചർച്ചകൾക്ക് ക്ഷണിച്ചത്.

ഒക്ടോബർ 27-ന് നടന്ന തിരഞ്ഞെടുപ്പിൽ 120 അംഗ ഇസ്രയേൽ പാർലമെന്റായ നെസെറ്റിൽ സർക്കാർ രൂപീകരിക്കാൻ ആവശ്യമായ 61 സീറ്റുകളുടെ ഭൂരിപക്ഷം ഒരു മുന്നണിക്കും ലഭിച്ചിരുന്നില്ല. ഐസൻകോടിന്റെ പ്രതിപക്ഷ സഖ്യത്തിന് 48 സീറ്റും നെതന്യാഹുവിന്റെ വലതുപക്ഷ സഖ്യത്തിന് 53 സീറ്റുമാണുള്ളത്. അറബ് പാർട്ടികൾക്ക് 19 സീറ്റുകളുണ്ട്. ഈ സാഹചര്യത്തിൽ പുതിയ സർക്കാർ രൂപീകരിക്കാൻ വിവിധ രാഷ്ട്രീയ കക്ഷികളുടെ പിന്തുണ അനിവാര്യമാണ്.

നെതന്യാഹുവിന് പകരം ഐക്യസർക്കാർ

നെതന്യാഹുവിന്റെ ലിക്കുഡ് പാർട്ടിയെ സഖ്യത്തിൽ ഉൾപ്പെടുത്താൻ ഐസൻകോട് തയാറാണെങ്കിലും നെതന്യാഹുവിന്റെ നേതൃത്വത്തിലുള്ള സർക്കാരിൽ പങ്കാളിയാകില്ലെന്ന നിലപാടിലാണ് അദ്ദേഹം. ഐസൻകോട് പ്രധാനമന്ത്രിയാകുന്ന ഐക്യസർക്കാരിൽ ലിക്കുഡ് അംഗങ്ങൾക്ക് പങ്കാളികളാകാമെന്നാണ് നിർദേശത്തിന്റെ അടിസ്ഥാനം.

മുൻ പ്രധാനമന്ത്രി നഫ്താലി ബെന്നറ്റും ഐസൻകോടിന്റെ നേതൃത്വത്തിൽ ദേശീയ ഐക്യസർക്കാർ രൂപീകരിക്കുന്നതിനെ പിന്തുണച്ചിട്ടുണ്ട്. എന്നാൽ നെതന്യാഹുവിനോ അദ്ദേഹത്തിന്റെ രാഷ്ട്രീയ സഖ്യത്തിനോ കീഴിൽ പ്രവർത്തിക്കില്ലെന്ന് ബെന്നറ്റ് വ്യക്തമാക്കിയിട്ടുണ്ട്.

അതേസമയം, അറബ് പാർട്ടികളുടെ പിന്തുണയോടെ ന്യൂനപക്ഷ സർക്കാർ രൂപീകരിക്കണമെന്ന നിർദേശവും ഐസൻകോടിന്റെ മുന്നണിയിൽ ഉയർന്നിട്ടുണ്ട്. എന്നാൽ ഇസ്രയേൽ ബെയ്തേനു പാർട്ടി നേതാവ് അവിഗ്ദോർ ലിബർമാൻ അറബ് പാർട്ടികളുടെ പിന്തുണയുള്ള സർക്കാരിൽ പങ്കാളിയാകില്ലെന്ന് വ്യക്തമാക്കിയിട്ടുണ്ട്. ഇതോടെ സർക്കാർ രൂപീകരണവുമായി ബന്ധപ്പെട്ട് പ്രതിപക്ഷ സഖ്യത്തിനുള്ളിലും അഭിപ്രായവ്യത്യാസങ്ങൾ നിലനിൽക്കുകയാണ്.

ലിക്കുഡിന്റെ ഉപാധികൾ

ഐക്യസർക്കാർ രൂപീകരിക്കുന്നതിന് ചില നിബന്ധനകൾ ലിക്കുഡ് മുന്നോട്ടുവച്ചിട്ടുണ്ട്. നെതന്യാഹുവിനും അദ്ദേഹത്തിന്റെ സർക്കാരിനുമെതിരായ രാഷ്ട്രീയ ബഹിഷ്കരണം അവസാനിപ്പിക്കണം, വ്യക്തിപരമായ അധിക്ഷേപങ്ങളും പ്രകോപനപരമായ പരാമർശങ്ങളും ഒഴിവാക്കണം തുടങ്ങിയ ആവശ്യങ്ങളാണ് പ്രധാനമായും ഉന്നയിച്ചിരിക്കുന്നത്.

പലസ്തീൻ രാഷ്ട്രം സ്ഥാപിക്കുന്നതിനെ എതിർക്കുക, ഗാസ, ലെബനൻ, സിറിയ എന്നിവിടങ്ങളിലെ സുരക്ഷാമേഖലകളിൽ ഇസ്രയേൽ സൈനിക സാന്നിധ്യം നിലനിർത്തുക, അൾട്രാ ഓർത്തഡോക്സ് വിഭാഗങ്ങളുടെ സൈനിക സേവനവുമായി ബന്ധപ്പെട്ട പ്രശ്നങ്ങൾക്ക് ധാരണയിലെത്തുക തുടങ്ങിയ നിർദേശങ്ങളും ലിക്കുഡ് മുന്നോട്ടുവച്ചിട്ടുണ്ട്.

ഡിസംബർ ആറുവരെ സമയപരിധി

നവംബർ എട്ടിനാണ് ഇസ്രയേൽ പ്രസിഡന്റ് ഐസക് ഹെർസോഗ് ഐസൻകോടിനെ സർക്കാർ രൂപീകരിക്കാൻ ചുമതലപ്പെടുത്തിയത്. 28 ദിവസമാണ് ഇതിനായി അനുവദിച്ചിട്ടുള്ളത്. ആവശ്യമെങ്കിൽ 14 ദിവസം കൂടി കാലാവധി നീട്ടാം. ഡിസംബർ ആറിനാണ് നിലവിലെ സമയപരിധി അവസാനിക്കുന്നത്.

വിശാലമായ സഖ്യം രൂപീകരിക്കാനുള്ള ശ്രമങ്ങൾ പരാജയപ്പെട്ടാൽ ന്യൂനപക്ഷ ദേശീയ അടിയന്തരസർക്കാർ രൂപീകരിക്കുന്നതിനുള്ള നിർദേശം പാർലമെന്റിൽ വോട്ടിനിടുമെന്നും ഐസൻകോട് സൂചിപ്പിച്ചിട്ടുണ്ട്. പുതിയ സർക്കാർ രൂപീകരണത്തിൽ നിർണായകമാകുന്ന ലിക്കുഡ് ചർച്ചകളുടെ ഫലമാണ് ഇനി ഇസ്രയേൽ രാഷ്ട്രീയം ഉറ്റുനോക്കുന്നത്

Leave a Reply

Your email address will not be published. Required fields are marked *