മെൽബൺ: ഓസ്ട്രേലിയയിലെ 15 വയസ്സുള്ള വിദ്യാർഥികളുടെ വായന, ഗണിത നിലവാരത്തിൽ ചരിത്രത്തിലെ ഏറ്റവും വലിയ ഇടിവ് രേഖപ്പെടുത്തി. കഴിഞ്ഞ 20 വർഷമായി തുടരുന്ന പഠനനിലവാര തകർച്ചയ്ക്ക് പുറമെ ക്ലാസ് മുറികളിലെ അച്ചടക്കമില്ലായ്മയും ഗുരുതരമായ പ്രതിസന്ധി സൃഷ്ടിക്കുന്നതായി പുതിയ റിപ്പോർട്ടുകൾ വ്യക്തമാക്കുന്നു.
2000-ലെ വിദ്യാർഥികളുടെ നിലവാരവുമായി താരതമ്യം ചെയ്യുമ്പോൾ ഇപ്പോഴത്തെ കുട്ടികൾ വായനാശേഷിയിൽ രണ്ട് വർഷത്തോളവും, 2003-ലെ നിലവാരവുമായി താരതമ്യം ചെയ്യുമ്പോൾ കണക്കിൽ രണ്ട് വർഷത്തിലധികവും പിന്നിലാണെന്ന് കണക്കുകൾ ചൂണ്ടിക്കാട്ടുന്നു. ക്ലാസ് മുറികളിലെ അച്ചടക്കത്തിന്റെ കാര്യത്തിൽ പങ്കെടുത്ത 80 രാജ്യങ്ങളിൽ 69-ാം സ്ഥാനത്താണ് ഓസ്ട്രേലിയ നിലവിലുള്ളത്.
പഠനത്തിൽ പങ്കെടുത്ത 41 ശതമാനം വിദ്യാർഥികളും ക്ലാസുകളിൽ നിരന്തരമായ ബഹളവും ക്രമക്കേടുകളും ഉള്ളതായി അറിയിച്ചു. മിക്ക ക്ലാസുകളിലും ശാന്തമായി പഠിക്കാൻ സാധിക്കുന്നില്ലെന്ന് 21 ശതമാനം പേർ പരാതിപ്പെട്ടു. കൂടാതെ, രണ്ടാഴ്ചയ്ക്കുള്ളിൽ ഒരു ദിവസമെങ്കിലും സ്കൂളിൽ ഹാജരാകാതിരുന്ന കുട്ടികൾ 44 ശതമാനമാണ്; ഇത് ഒ.ഇ.സി.ഡി (OECD) ശരാശരിയേക്കാൾ ഇരട്ടിയോളമാണ്. അച്ചടക്കമില്ലായ്മ കാരണം പഠന സമയത്തിന്റെ മൂന്നിലൊന്ന് നഷ്ടപ്പെടുന്നുവെന്നാണ് അധ്യാപകർക്കിടയിൽ നടത്തിയ സർവേ വ്യക്തമാക്കുന്നത്.
ഓസ്ട്രേലിയ ഇപ്പോഴും ഒ.ഇ.സി.ഡി അക്കാദമിക് ശരാശരിക്ക് മുകളിലാണെങ്കിലും, മികച്ച പ്രകടനം നടത്തുന്ന കുട്ടികളുടെ എണ്ണത്തിൽ കുറവുണ്ടാകുകയും പഠനത്തിൽ പിന്നാക്കം പോകുന്നവരുടെ എണ്ണം വർധിക്കുകയും ചെയ്യുന്നത് ആശങ്ക ഉയർത്തുന്നുണ്ട്. രാജ്യത്തിന്റെ ഭാവി തലമുറയുടെ വളർച്ചയെ ബാധിക്കുന്ന ഗുരുതരമായ മുന്നറിയിപ്പായാണ് വിദഗ്ധർ ഇതിനെ വിലയിരുത്തുന്നത്.
