ന്യൂഡൽഹി: ഇന്ത്യയും പോളണ്ടും തമ്മിലുള്ള തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്താൻ തീരുമാനമായി. പ്രധാനമന്ത്രി നരേന്ദ്ര മോദിയും പോളിഷ് പ്രധാനമന്ത്രി ഡൊണാൾഡ് ടസ്കും ന്യൂഡൽഹിയിലെ ഹൈദരാബാദ് ഹൗസിൽ നടത്തിയ ഉഭയകക്ഷി ചർച്ചയിലാണ് പ്രതിരോധം, ബഹിരാകാശം, ആണവോർജം തുടങ്ങിയ മേഖലകളിൽ സഹകരണം വ്യാപിപ്പിക്കാൻ ധാരണയായത്.
2030ഓടെ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം ഇരട്ടിയാക്കുകയാണ് ലക്ഷ്യം. റെയിൽവേ, നൂതന നിർമാണം, ഭക്ഷ്യസംസ്കരണം തുടങ്ങിയ മേഖലകളിൽ നിക്ഷേപം വർധിപ്പിക്കാനും തീരുമാനിച്ചു. പ്രതിരോധ വ്യവസായ മേഖലയിലെ സഹകരണം ശക്തിപ്പെടുത്തുന്നതിനായി ഇരുരാജ്യങ്ങളും തമ്മിൽ പ്രതിരോധ വ്യവസായ സംവാദത്തിനും തുടക്കമിട്ടു.
നിർമിതബുദ്ധി (എഐ), ഹരിത സാങ്കേതികവിദ്യകൾ, നിർണായക ധാതുക്കൾ, സമുദ്രസുരക്ഷ, ഭീകരവിരുദ്ധ പ്രവർത്തനങ്ങൾ തുടങ്ങിയ മേഖലകളിലും സഹകരണം വിപുലീകരിക്കും. പ്രതിരോധ മേഖലയിൽ സംയുക്ത വികസനത്തിനും ഉൽപ്പാദനത്തിനും ഇന്ത്യൻ കമ്പനികളുമായി സഹകരിക്കാൻ പോളിഷ് കമ്പനികളെ പ്രധാനമന്ത്രി നരേന്ദ്ര മോദി ക്ഷണിച്ചു.
യുക്രെയ്നിലും പശ്ചിമേഷ്യയിലും സമാധാനം കൊണ്ടുവരാനുള്ള എല്ലാ അർഥവത്തായ ശ്രമങ്ങൾക്കും ഇന്ത്യ പിന്തുണ നൽകുമെന്ന് മോദി വ്യക്തമാക്കി. ആഗോളതലത്തിൽ നിലനിൽക്കുന്ന അനിശ്ചിതത്വങ്ങൾക്കിടയിലും ഇന്ത്യയും പോളണ്ടും വളർച്ചയുടെയും സാങ്കേതികവിദ്യയുടെയും നൂതനാശയങ്ങളുടെയും പ്രധാന കേന്ദ്രങ്ങളായി ഉയർന്നുവരുകയാണെന്നും അദ്ദേഹം പറഞ്ഞു.
മൂന്നു ദിവസത്തെ ഔദ്യോഗിക സന്ദർശനത്തിനായി ഒക്ടോബർ 21ന് ഇന്ത്യയിലെത്തിയ ടസ്ക്, വിദേശകാര്യ മന്ത്രി എസ്. ജയശങ്കറുമായും കൂടിക്കാഴ്ച നടത്തി. ബെംഗളൂരുവിൽ നടക്കുന്ന ഇന്ത്യ–പോളണ്ട് ബിസിനസ് ഫോറത്തിലും അദ്ദേഹം പങ്കെടുക്കും.
