മെൽബൺ: ഓസ്ട്രേലിയയിലെ വിക്ടോറിയൻ സംസ്ഥാന തിരഞ്ഞെടുപ്പ് പ്രചാരണങ്ങളെ സ്വാധീനിക്കാനും ജനങ്ങൾക്കിടയിൽ തെറ്റിദ്ധാരണ പരത്താനും ആർട്ടിഫിഷ്യൽ ഇന്റലിജൻസ് (എ.ഐ) അധിഷ്ഠിത വ്യാജ ദൃശ്യങ്ങൾ (ഡീപ്ഫേക്ക്) വ്യാപകമായി ദുരുപയോഗം ചെയ്യപ്പെടുന്നതായി റിപ്പോർട്ട്. വോട്ടെടുപ്പിന് മുന്നോടിയായി പണം നൽകിയുള്ള ഡിജിറ്റൽ പരസ്യങ്ങളുടെ രൂപത്തിലാണ് ഇത്തരം വ്യാജ നിർമ്മിതികൾ ജനങ്ങൾക്ക് മുന്നിലെത്തുന്നത്.
പെട്രോൾ പമ്പിൽ നടക്കുന്ന കൊലപാതക സമാനമായ വടിവാൾ ആക്രമണം, റോഡരികിൽ പ്രസവിക്കുന്ന സ്ത്രീ, പാർലമെന്റ് പടികളിലൂടെ ഒഴുകിയിറങ്ങുന്ന പ്രളയജലം തുടങ്ങി യഥാർത്ഥത്തിൽ നടന്നിട്ടില്ലാത്ത സംഭവങ്ങളാണ് അതീവ കൃത്യതയോടെ എ.ഐ സാങ്കേതികവിദ്യ വഴി സൃഷ്ടിച്ചെടുത്തിരിക്കുന്നത്. വോട്ടർമാരെ സ്വാധീനിക്കാനും രാഷ്ട്രീയ ധ്രുവീകരണം ലക്ഷ്യമിട്ടും തയ്യാറാക്കിയ ഇത്തരം ‘ഡീപ്ഫേക്ക്’ പരസ്യങ്ങൾ വലിയ ആശങ്കയ്ക്ക് വഴിവെച്ചിരിക്കുകയാണ്.
