നഗോയ: 2026 ഏഷ്യൻ ഗെയിംസിൽ ഇന്ത്യ 85 മെഡലുകളുമായി നാലാം സ്ഥാനത്ത്. 21 സ്വർണം, 27 വെള്ളി, 37 വെങ്കലം എന്നിങ്ങനെയാണ് ഇന്ത്യയുടെ മെഡൽ നേട്ടം. അവസാന ദിനത്തിലെ മികച്ച പ്രകടനമാണ് ഇന്ത്യയെ ആദ്യ നാലിൽ എത്തിച്ചത്.
അവസാന ദിനം ഇന്ത്യ അഞ്ച് സ്വർണം നേടി. ഗുസ്തിയിൽ അമൻ സെഹ്‌റാവത്ത്, വനിതാ ഗോൾഫിൽ പ്രണവി ഉഴ്സ്, വനിതകളുടെ വ്യക്തിഗത റികർവ് അമ്പെയ്ത്തിൽ കുമ്കും മോഹോദ്, പുരുഷ ക്രിക്കറ്റിൽ ഇന്ത്യൻ ടീം, പുരുഷ ഹോക്കിയിൽ ഇന്ത്യൻ ടീം എന്നിവരാണ് സ്വർണം നേടിയത്. മലേഷ്യയെ 5–1ന് തോൽപ്പിച്ചാണ് പുരുഷ ഹോക്കി ടീം കിരീടം നിലനിർത്തിയത്. ഇതോടെ 2028 ലോസ് ആഞ്ചലസ് ഒളിംപിക്സിലേക്കുള്ള നേരിട്ടുള്ള യോഗ്യതയും ഇന്ത്യ ഉറപ്പാക്കി.
21 സ്വർണവുമായി ഉസ്ബക്കിസ്ഥാനും ഇന്ത്യയ്ക്കൊപ്പം നിന്നെങ്കിലും ഇന്ത്യ നേടിയ കൂടുതൽ വെള്ളിമെഡലുകളുടെ അടിസ്ഥാനത്തിലാണ് ഇന്ത്യ നാലാം സ്ഥാനത്തെത്തിയത്. ഉസ്ബക്കിസ്ഥാന് 21 സ്വർണം, 25 വെള്ളി, 24 വെങ്കലം ഉൾപ്പെടെ 70 മെഡലുകളാണുള്ളത്. ചൈന 169 സ്വർണമടക്കം 341 മെഡലുകളുമായി ഒന്നാമതും ജപ്പാൻ 83 സ്വർണമടക്കം 269 മെഡലുകളുമായി രണ്ടാമതും ദക്ഷിണ കൊറിയ 39 സ്വർണമടക്കം 150 മെഡലുകളുമായി മൂന്നാമതുമാണ്.
2023ലെ ഹാങ്‌ചൗ ഏഷ്യൻ ഗെയിംസിൽ 106 മെഡലുകൾ നേടിയ ഇന്ത്യയ്ക്ക് ഇത്തവണ ആ നേട്ടം മറികടക്കാനായില്ല. എന്നാൽ നാലാം സ്ഥാനമെന്ന നേട്ടം ഇന്ത്യ നിലനിർത്തി.
