ഗുവാഹത്തി: അസമിൽ തുടരുന്ന പ്രളയത്തിൽ മരിച്ചവരുടെ എണ്ണം 68 ആയി ഉയർന്നു. സംസ്ഥാനത്തെ 763 ഗ്രാമങ്ങളിലായി 5.24 ലക്ഷത്തിലധികം ആളുകൾ ഇപ്പോഴും പ്രളയബാധിതരാണെന്ന് അസം സ്റ്റേറ്റ് ഡിസാസ്റ്റർ മാനേജ്മെന്റ് അതോറിറ്റി (ASDMA) അറിയിച്ചു. നിരവധി പ്രദേശങ്ങൾ ഇപ്പോഴും വെള്ളത്തിനടിയിലായതിനാൽ രക്ഷാപ്രവർത്തനവും ദുരിതാശ്വാസവും തുടരുകയാണ്.
ബ്രഹ്മപുത്രയും അനുബന്ധ നദികളും കരകവിഞ്ഞൊഴുകിയതിനെ തുടർന്ന് വ്യാപകമായ നാശനഷ്ടങ്ങളാണ് ഉണ്ടായത്. വീടുകൾ, കൃഷിയിടങ്ങൾ, റോഡുകൾ എന്നിവ വെള്ളത്തിനടിയിലായതോടെ ആയിരക്കണക്കിന് ആളുകളെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചിട്ടുണ്ട്. വിവിധ സർക്കാർ ഏജൻസികളും ദുരന്തനിവാരണ സേനയും രക്ഷാപ്രവർത്തനത്തിൽ സജീവമായി തുടരുകയാണെന്നും അധികൃതർ അറിയിച്ചു.
