ഗുവാഹത്തി: അസമിലെ പ്രളയത്തിൽ മരിച്ചവരുടെ എണ്ണം 78 ആയി. ബുധനാഴ്ച മൂന്ന് പേരുടെ കൂടി മരണം റിപ്പോർട്ട് ചെയ്തതോടെയാണ് മരണസംഖ്യ ഉയർന്നത്. സംസ്ഥാനത്തെ ഏഴ് ജില്ലകളിലായി മൂന്ന് ലക്ഷത്തിലധികം ആളുകൾ ഇപ്പോഴും പ്രളയബാധിതരായി തുടരുകയാണ്.
പ്രളയജലം പല പ്രദേശങ്ങളിലും കുറഞ്ഞെങ്കിലും ചെളിയും മണ്ണിടിച്ചിലും റോഡുകൾ തകർന്നതിനാൽ നിരവധി പേർക്ക് വീടുകളിലേക്ക് മടങ്ങാൻ കഴിഞ്ഞിട്ടില്ല. നിരവധി വീടുകൾക്കും അടിസ്ഥാന സൗകര്യങ്ങൾക്കും കനത്ത നാശനഷ്ടമുണ്ടായതായി അസം സർക്കാർ അറിയിച്ചു.
രക്ഷാപ്രവർത്തനവും ദുരിതാശ്വാസ വിതരണവും തുടരുകയാണ്. അതേസമയം, അടുത്ത ദിവസങ്ങളിലും ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഇതോടെ ദുരിതബാധിത മേഖലകളിലെ പുനരധിവാസ പ്രവർത്തനങ്ങൾ കൂടുതൽ വെല്ലുവിളി നേരിടുമെന്ന ആശങ്ക ഉയർന്നിട്ടുണ്ട്.
