ന്യൂഡൽഹി: സ്വാതന്ത്ര്യദിനാഘോഷങ്ങൾക്ക് ഒരു ദിവസം മാത്രം ശേഷിക്കെ ഡൽഹി ഹൈക്കോടതിക്ക് ഇ-മെയിൽ വഴി ബോംബ് ഭീഷണി. വെള്ളിയാഴ്ച രാവിലെ ലഭിച്ച ഭീഷണി സന്ദേശത്തെ തുടർന്ന് ഹൈക്കോടതി പരിസരത്ത് സുരക്ഷാ പരിശോധന ശക്തമാക്കി.
ഹൈക്കോടതിക്ക് പുറമെ ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ടെർമിനൽ-3 ഉൾപ്പെടെയുള്ള ചില പ്രധാന കേന്ദ്രങ്ങൾക്കും സമാനമായ ഭീഷണി സന്ദേശങ്ങൾ ലഭിച്ചതായി റിപ്പോർട്ടുകളുണ്ട്.
ഹൈക്കോടതിക്ക് ലഭിച്ച ഇ-മെയിലിൽ ചെങ്കോട്ടയെ ലക്ഷ്യമാക്കുന്നതായും ഖാക്കി വേഷത്തിലുള്ള ആക്രമികളെക്കുറിച്ചും പരാമർശമുണ്ടായിരുന്നുവെന്നാണ് റിപ്പോർട്ട്. സന്ദേശം ലഭിച്ചതിനെ തുടർന്ന് സുരക്ഷാ പ്രോട്ടോക്കോൾ പ്രകാരം കോടതിയിൽ വിശദമായ പരിശോധന നടത്തി.
സുരക്ഷാ ഉദ്യോഗസ്ഥർ നടത്തിയ പരിശോധനയിൽ സ്ഫോടകവസ്തുക്കളൊന്നും കണ്ടെത്തിയില്ലെന്നാണ് അധികൃതരെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നത്. ലഭിച്ച ഭീഷണികൾ വ്യാജമാണെന്നാണ് പ്രാഥമിക വിലയിരുത്തൽ. സംഭവത്തിൽ ഭീഷണി സന്ദേശങ്ങളുടെ ഉറവിടം കണ്ടെത്തുന്നതിനായി അന്വേഷണം തുടരുകയാണ്.
സ്വാതന്ത്ര്യദിനാഘോഷങ്ങളുടെ ഭാഗമായി ഡൽഹിയിൽ നേരത്തെ തന്നെ കനത്ത സുരക്ഷാ ക്രമീകരണങ്ങൾ ഏർപ്പെടുത്തിയിട്ടുണ്ട്. ചെങ്കോട്ടയിലും സമീപപ്രദേശങ്ങളിലും ഗതാഗത നിയന്ത്രണങ്ങളും പരിശോധനകളും ശക്തമാക്കിയിട്ടുണ്ട്.
