സിഡ്നി: സിഡ്നിയിലെ ഏറ്റവും തിരക്കേറിയ റോഡുകളിലൊന്നിലുണ്ടായ കടുത്ത നിയന്ത്രണംവിട്ട കാറപകടത്തിൽ നിന്നും ഇരുപത്തിനാലുകാരനായ യുവാവ് അത്ഭുതകരമായി രക്ഷപ്പെട്ടു. ഞായറാഴ്ച രാത്രി 9.30-ഓടെ സിഡ്നിയുടെ തെക്കുപടിഞ്ഞാറൻ മേഖലയിലുള്ള വില്ലാവുഡിലെ ഹ്യൂം ഹൈവേയിലാണ് (Hume Highway) സിനിമാ രംഗങ്ങളെ അനുസ്മരിപ്പിക്കുന്ന അപകടം നടന്നത്. നിയന്ത്രണം വിട്ട സെഡാൻ കാർ മറ്റൊരു ഹാച്ച്ബാക്ക് കാറിലിടിച്ച ശേഷം റോഡരികിലെ വൈദ്യുത പോസ്റ്റിലേക്ക് ശക്തമായി ഇടിച്ചുകയറുകയായിരുന്നു.
ഇടിയുടെ ആഘാതത്തിൽ കാർ രണ്ടായി പിളരുകയും നിമിഷങ്ങൾക്കകം തീപിടിക്കുകയും ചെയ്തു. അപകടത്തിന്റെ തീവ്രത കാരണം കാറിന്റെ പകുതി ഭാഗം അപകടസ്ഥലത്തുനിന്നും 200 മീറ്റർ അകലെയാണ് തെറിച്ചുവീണത്. കാറിന് തീപിടിക്കുന്നതിന് തൊട്ടുമുൻപ് പരിക്കുകളോടെ ഡ്രൈവർ പുറത്തേക്ക് ഓടി രക്ഷപ്പെടുകയായിരുന്നു. റോഡിലൂടെ പോയ യാത്രക്കാരും പാരാമെഡിക്കൽ ജീവനക്കാരും ചേർന്ന് ഇയാൾക്ക് പ്രാഥമിക ശുശ്രൂഷ നൽകിയ ശേഷം റോയൽ നോർത്ത് ഷോർ ആശുപത്രിയിലേക്ക് മാറ്റി. ഇയാൾക്ക് ഗുരുതരമായ പൊള്ളലും ഒടിവുകളുമുണ്ട്. ഹാച്ച്ബാക്ക് കാർ ഓടിച്ചിരുന്ന 48-കാരനെ ലിവർപൂൾ ആശുപത്രിയിലും പ്രവേശിപ്പിച്ചു. ഇടിയുടെ ആഘാതത്തിൽ വൈദ്യുത പോസ്റ്റ് ഒടിഞ്ഞ് വീണതിനെ തുടർന്ന് പ്രദേശത്തെ നിരവധി വീടുകളിൽ വൈദ്യുതി ബന്ധം തടസ്സപ്പെട്ടു. തിങ്കളാഴ്ച രാവിലെ എട്ടുമണിയോടെയാണ് ഹൈവേയിലെ ഗതാഗതം പൂർണ്ണസ്ഥിതിയിലായത്. അപകടത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്.
ഇതിന് പുറമെ കഴിഞ്ഞ 24 മണിക്കൂറിനിടെ ന്യൂ സൗത്ത് വെയിൽസ് (NSW) റോഡുകളിൽ മറ്റ് രണ്ട് ദരുണ അപകടങ്ങൾ കൂടി റിപ്പോർട്ട് ചെയ്തിട്ടുണ്ട്. നോർത്ത് കോസ്റ്റിലെ കോഫ്സ് ഹാർബറിന് സമീപം കാർ വൈദ്യുത പോസ്റ്റിലിടിച്ച് ഇരുപതുകളിൽ പ്രായമുള്ള യുവതി മരണപ്പെട്ടു. കാറിലുണ്ടായിരുന്ന മറ്റ് രണ്ട് യാത്രക്കാർ പരിക്കുകളോടെ രക്ഷപ്പെട്ടു. മറ്റൊരു അപകടത്തിൽ, സിഡ്നിയുടെ വടക്കുപടിഞ്ഞാറൻ മേഖലയായ ബെല്ല വിസ്തയിൽ ബസും നിസ്സാൻ കാറും കൂട്ടിയിടിച്ച് കാർ യാത്രക്കാരനായ 87-കാരൻ ആശുപത്രിയിൽ മരണമടഞ്ഞു. അപകടത്തിൽ തകർന്ന കാറിനുള്ളിൽ കുടുങ്ങിപ്പോയ ഡ്രൈവറെയും മറ്റ് യാത്രക്കാരെയും ഏറെ പ്രയത്നിച്ചാണ് രക്ഷാപ്രവർത്തകർ പുറത്തെടുത്തത്. പരിക്കേറ്റ ബസ് ഡ്രൈവറും നിലവിൽ ചികിത്സയിലാണ്.
