തിരുവനന്തപുരം: മുഖ്യമന്ത്രി പിണറായി വിജയനെതിരെ കേസെടുക്കാൻ നിലവിലെ സാഹചര്യത്തിൽ മതിയായ തെളിവുകളില്ലെന്ന് അഡ്വക്കേറ്റ് ജനറൽ നിയമോപദേശം നൽകിയതായി റിപ്പോർട്ട്. ഇഡി സമർപ്പിച്ച രേഖകളും തെളിവുകളും പരിശോധിച്ച ശേഷമാണ് എജിയുടെ നിലപാടെന്നാണ് വിവരം.
വീണാ വിജയന്റെ സ്ഥാപനവുമായി ബന്ധപ്പെട്ട സാമ്പത്തിക ഇടപാടുകളാണ് അന്വേഷണത്തിന്റെ ഭാഗമായി പ്രധാനമായും പരിശോധിക്കുന്നത്. ഇടപാടുകളുമായി ബന്ധപ്പെട്ട പണം ബാങ്ക് വഴിയാണ് കൈമാറിയതെന്നതടക്കമുള്ള കാര്യങ്ങൾ ചൂണ്ടിക്കാട്ടിയാണ് പിണറായി വിജയനെതിരെ നേരിട്ട് കേസ് രജിസ്റ്റർ ചെയ്യുന്നതിനുള്ള തെളിവുകൾ പര്യാപ്തമല്ലെന്ന നിയമോപദേശം നൽകിയതെന്നാണ് റിപ്പോർട്ട്.
അതേസമയം, ഇഡിയുടെ അന്വേഷണത്തിൽ ഉയർന്ന ആരോപണങ്ങൾ തെളിയിക്കപ്പെട്ടുവെന്ന നിലയിൽ നിയമോപദേശത്തെ കാണാനാകില്ല. നിലവിലുള്ള തെളിവുകളുടെ അടിസ്ഥാനത്തിൽ പിണറായി വിജയനെതിരെ കേസ് രജിസ്റ്റർ ചെയ്യുന്നതിനുള്ള നിയമപരമായ സാഹചര്യമുണ്ടോ എന്നതാണ് എജി പരിശോധിച്ചതെന്നാണ് റിപ്പോർട്ടിലെ വിവരം.
വീണാ വിജയൻ ഉൾപ്പെട്ട ഇടപാടുകളുമായി ബന്ധപ്പെട്ട അന്വേഷണം തുടരുന്നതിനിടെയാണ് പിണറായി വിജയനെതിരെ കേസെടുക്കുന്നതുമായി ബന്ധപ്പെട്ട നിയമോപദേശം പുറത്തുവരുന്നത്.
