കോട്ടയം: നേരേകടവ് – മാക്കേകടവ് പാലവുമായി വൈക്കം – എറണാകുളം പാതയെ ബന്ധിപ്പിക്കുന്ന റോഡിന്റെ വികസനത്തിന് അടിയന്തര നടപടികൾ സ്വീകരിക്കുമെന്ന് ജലവിഭവ-ഭവനനിർമാണ വകുപ്പ് മന്ത്രി മോൻസ് ജോസഫ്. പാലം പദ്ധതിയുടെ നിർമാണ പുരോഗതി നേരിട്ടെത്തി വിലയിരുത്തിയ ശേഷം സംസാരിക്കുകയായിരുന്നു അദ്ദേഹം.
കോട്ടയം ജില്ലയിലെ ഉദയനാപുരം, ആലപ്പുഴ ജില്ലയിലെ തൈക്കാട്ടുശേരി ഗ്രാമപഞ്ചായത്തുകളെ ബന്ധിപ്പിച്ച് വേമ്പനാട്ട് കായലിന് കുറുകെയാണ് 800 മീറ്റർ നീളമുള്ള പാലം നിർമിക്കുന്നത്. പൊതുമരാമത്ത്, റവന്യൂ മന്ത്രിമാരുമായി എം.എൽ.എ-മാരുടെ സാന്നിധ്യത്തിൽ ചർച്ച നടത്തി റോഡ് വികസന കാര്യത്തിൽ അന്തിമ തീരുമാനമെടുക്കും. നിലവിൽ പാലത്തിന്റെ നിർമാണം അന്തിമഘട്ടത്തിലാണ്. അപ്രോച്ച് റോഡിന്റെ ടാറിംഗ് ജോലികളാണ് ഇനി പ്രധാനമായും പൂർത്തിയാക്കാനുള്ളത്.
വൈദ്യുതി കേബിളുകൾ സ്ഥാപിക്കുന്നതുമായി ബന്ധപ്പെട്ട് കെ.എസ്.ഇ.ബിയുമായി പൊതുമരാമത്ത് വകുപ്പ് ചർച്ച നടത്തിയിട്ടുണ്ട്. ഈ പ്രവൃത്തികൾ അഞ്ചു ദിവസത്തിനകം പൂർത്തിയാക്കാൻ നിർദേശം നൽകി. ഇതിനുശേഷം ഉടൻതന്നെ ടാറിംഗ് ആരംഭിക്കും. സെപ്റ്റംബർ 30-നകം ടാറിംഗ് പൂർത്തിയാക്കാനായിരുന്നു നേരത്തെ നിശ്ചയിച്ചിരുന്നതെങ്കിലും നിലവിലെ സാഹചര്യത്തിൽ ഏതാനും ദിവസങ്ങൾ കൂടി വേണ്ടിവരുമെന്ന് മന്ത്രി അറിയിച്ചു. തോടിന്റെ അരികിലുള്ള സമീപനപാതയുടെ ഭാഗം സംരക്ഷിച്ചു കെട്ടുന്നതിനായി ജലസേചന വകുപ്പ് പഠനം നടത്തും. ഇതിനായി ഫണ്ട് ഉടൻ അനുവദിക്കുമെന്നും പഠന റിപ്പോർട്ടിന്റെ അടിസ്ഥാനത്തിൽ എസ്റ്റിമേറ്റ് തയ്യാറാക്കി കൂടുതൽ തുക ലഭ്യമാക്കുമെന്നും അദ്ദേഹം കൂട്ടിച്ചേർത്തു.
ഒക്ടോബർ പകുതിയോടെ പാലം ഗതാഗതത്തിനായി തുറന്നുകൊടുക്കാനുള്ള നടപടികളാണ് പുരോഗമിക്കുന്നതെന്ന് കെ. ബിനിമോൻ എം.എൽ.എ പറഞ്ഞു. കെ.എസ്.ഇ.ബി, പൊതുമരാമത്ത്, ജലസേചന വകുപ്പ് ഉദ്യോഗസ്ഥരും സന്ദർശന വേളയിൽ ഒപ്പമുണ്ടായിരുന്നു.
തുറവൂർ – പമ്പാ പാതയുടെ രണ്ടാംഘട്ട പദ്ധതിയിൽ ഉൾപ്പെടുത്തി 93.35 കോടി രൂപ ചെലവഴിച്ചാണ് നേരേകടവ് – മാക്കേകടവ് പാലം നിർമിക്കുന്നത്. 11.23 മീറ്റർ വീതിയും 22 സ്പാനുകളുമുള്ള ഈ പാലം യാഥാർഥ്യമാകുന്നതോടെ വൈക്കത്തുനിന്ന് കൊച്ചിയിലേക്കുള്ള യാത്രാദൂരം ഗണ്യമായി കുറയും.
