ക്വീൻസ്‌ലൻഡ്: അപ്രതീക്ഷിതമായി കാർ പാർക്കിങ്ങിൽ വെച്ച് കഠിനമായ പ്രസവവേദന അനുഭവപ്പെട്ട യുവതിക്ക് സമയോചിതമായ ഇടപെടലിലൂടെ സുരക്ഷിതമായി പ്രസവമൊരുക്കി മലയാളി നഴ്സ് സിന്ധു ടോണി. ക്വീൻസ്‌ലൻഡിലെ സൺഷൈൻ കോസ്റ്റ് യൂണിവേഴ്സിറ്റി ആശുപത്രിയിൽ നടന്ന ഈ സംഭവം അമ്മയ്ക്കും നവജാത ശിശുവിനും തുണയായതിനൊപ്പം ഓസ്‌ട്രേലിയൻ മാധ്യമങ്ങളിലും പൊതുസമൂഹത്തിനിടയിലും വലിയ പ്രശംസ നേടുകയാണ്.
ആശുപത്രി സ്വിച്ച്‌ബോർഡിൽ നിന്ന് കാർ പാർക്കിങ് ഏരിയയിൽ പ്രസവവേദന അനുഭവിക്കുന്ന യുവതിയുണ്ടെന്ന അടിയന്തര സന്ദേശം ലഭിച്ച ഉടൻ തന്നെ സിന്ധു സംഭവസ്ഥലത്തേക്ക് ഓടിയെത്തുകയായിരുന്നു. ലിഫ്റ്റുകൾക്ക് സമീപം ഭർത്താവിനൊപ്പം നിൽക്കുന്ന യുവതിയെ കണ്ടപ്പോൾ തന്നെ ചുറ്റും രക്തവും അമ്നിയോട്ടിക് ദ്രവവും പടർന്ന് സാഹചര്യം അതീവ ഗുരുതരമായി മാറിയിരുന്നു. സമയം ഒട്ടും പാഴാക്കാനില്ലെന്ന് മനസ്സിലാക്കിയ സിന്ധു ഉടൻ തന്നെ പ്രസവവാർഡിൽ നിന്നുള്ള സഹായം തേടുകയും പരിഭ്രാന്തയായ യുവതിക്ക് മാനസികമായ ആശ്വാസവും ശാരീരിക പിന്തുണയും നൽകുകയും ചെയ്തു.
പ്രാഥമിക പരിശോധനയിൽ തന്നെ യുവതി പ്രസവത്തിന്റെ അവസാന ഘട്ടത്തിലാണെന്നും അതികഠിനമായ വേദന അനുഭവിക്കുന്നുണ്ടെന്നും വ്യക്തമായി. തൊട്ടടുത്ത നിമിഷങ്ങളിൽ തന്നെ കുഞ്ഞിന്റെ തല പുറത്തുവരുന്നത് കണ്ടതോടെ പ്രസവവാർഡിലേക്ക് മാറ്റാൻ കാത്തുനിൽക്കാതെ പരിമിതമായ സൗകര്യങ്ങൾക്കിടയിലും കാർ പാർക്കിങ്ങിൽ വെച്ചുതന്നെ പ്രസവമെടുക്കാൻ സിന്ധു തീരുമാനിക്കുകയായിരുന്നു. അതീവ ശ്രദ്ധയോടെ നവജാത ശിശുവിനെ കൈകളിലെടുത്ത അവർ, കുഞ്ഞിന്റെ ശ്വാസനാളം തുറന്നിട്ടുണ്ടെന്ന് ഉറപ്പുവരുത്തുകയും കൃത്യമായ പരിചരണം നൽകുകയും ചെയ്തു. നിമിഷങ്ങൾക്കകം കാർ പാർക്കിങ്ങിൽ കുഞ്ഞിന്റെ ഉച്ചത്തിലുള്ള കരച്ചിൽ ഉയർന്നുകേട്ടതോടെ അതൊരു വലിയ ആശ്വാസനിമിഷമായി മാറി. തുടർന്ന് കുഞ്ഞിനെ അമ്മയുടെ നെഞ്ചിൽ കിടത്തി ഇരുവരെയും സുരക്ഷിതമായി പ്രസവവാർഡിലേക്ക് മാറ്റുകയും തുടർപരിചരണങ്ങൾ ഉറപ്പാക്കുകയും ചെയ്തു. ആ നിർണായക ഘട്ടത്തിൽ സഹായിക്കാൻ കഴിഞ്ഞതിൽ വലിയ അഭിമാനമുണ്ടെന്നും അമ്മയെയും കുഞ്ഞിനെയും ആരോഗ്യത്തോടെ ഒന്നിച്ചു കാണാനായതാണ് ഔദ്യോഗിക ജീവിതത്തിലെ ഏറ്റവും വിലപ്പെട്ട അനുഭവമെന്നും സിന്ധു പറഞ്ഞു.
കോട്ടയം പാലാ സ്വദേശിനിയായ സിന്ധു ടോണി, ഇന്ത്യയിലും യുകെയിലും ഓസ്‌ട്രേലിയയിലുമായി ദീർഘകാലത്തെ സേവനപരിചയമുള്ള സീനിയർ നഴ്സാണ്. ബംഗളൂരുവിലെ സി.എസ്.ഐ (CSI) ആശുപത്രിയിൽ നിന്നാണ് നഴ്സിംഗ് ആൻഡ് മിഡ്‌വൈഫറി പഠനം പൂർത്തിയാക്കിയത്. തുടർന്ന് അതേ ആശുപത്രിയിൽ രണ്ട് വർഷം ജോലി ചെയ്ത സിന്ധു, പിന്നീട് ബംഗളൂരു മണിപ്പാൽ ആശുപത്രിയിലെ ന്യൂറോസർജിക്കൽ ഇന്റൻസീവ് കെയർ യൂണിറ്റിൽ (ICU) നാലുവർഷം സേവനമനുഷ്ഠിച്ചു. 2005-ൽ യുണൈറ്റഡ് കിംഗ്ഡത്തിലേക്ക് കുടിയേറിയ അവർ ലിവർപൂളിലെ വാൾട്ടൺ സെന്റർ ഫോർ ന്യൂറോളജി ആൻഡ് ന്യൂറോസർജറി ഐ.സി.യു-വിൽ ആറുവർഷം സേവനം ചെയ്തു. തുടർന്ന് 2012-ൽ ഓസ്‌ട്രേലിയയിലെത്തി ന്യൂ സൗത്ത് വെയിൽസിലെ വാഗ വാഗ ബേസ് ആശുപത്രി ഐ.സി.യു-വിൽ 11 വർഷത്തോളം സ്തുത്യർഹമായ സേവനമനുഷ്ഠിച്ചു.
നിലവിൽ സൺഷൈൻ കോസ്റ്റിൽ സ്ഥിരതാമസമാക്കിയ സിന്ധു, സൺഷൈൻ കോസ്റ്റ് യൂണിവേഴ്സിറ്റി ആശുപത്രിയിലെ ഐ.സി.യു രജിസ്റ്റേർഡ് നഴ്സ്, ടീം ലീഡർ, മെഡിക്കൽ എമർജൻസി ടീം ക്ലിനിക്കൽ നഴ്സ് (MET-CN) എന്നീ സുപ്രധാന ചുമതലകളാണ് വഹിക്കുന്നത്. രോഗികളുടെ ആരോഗ്യനില പെട്ടെന്ന് വഷളാകുന്ന സങ്കീർണ്ണ സാഹചര്യങ്ങളിൽ അടിയന്തരമായി ഇടപെടുന്ന ഡിറ്റീരിയറേറ്റിങ് പേഷ്യന്റ് റെസ്‌പോൺസ് (DPR) ടീമിലെ സിന്ധുവിന്റെ സേവനം ഏറെ വെല്ലുവിളികളും ഉത്തരവാദിത്തങ്ങളും നിറഞ്ഞതാണ്. രോഗിയുടെ ശാരീരികാവസ്ഥയിലെ വ്യതിയാനങ്ങൾ മുൻകൂട്ടി തിരിച്ചറിഞ്ഞ് സമയോചിതമായി തീരുമാനമെടുക്കുന്നതാണ് മികച്ച രോഗീപരിചരണത്തിന് നിർണായകമെന്ന് അവർ സാക്ഷ്യപ്പെടുത്തുന്നു.
ദീർഘകാലത്തെ അന്താരാഷ്ട്ര തൊഴിൽപരിചയത്തിനൊപ്പം ഭർത്താവ് ടോണി ജോസഫ് തൈലമ്മനാലും മൂന്ന് ആൺമക്കളുമടങ്ങുന്ന കുടുംബം നൽകുന്ന അകമഴിഞ്ഞ പിന്തുണയാണ് തന്റെ ഔദ്യോഗിക ജീവിതത്തിലെ ഏറ്റവും വലിയ കരുത്തെന്ന് സിന്ധു കൂട്ടിച്ചേർത്തു. പ്രവാസലോകത്ത് എന്നത്തേക്കാളും ഏറെ വർണ്ണ-വംശീയ വെല്ലുവിളികൾ ചർച്ചയാകുന്ന ഈ കാലഘട്ടത്തിലും, രോഗികളുടെ സുരക്ഷയ്ക്കും ജീവനും മാത്രം മുൻഗണന നൽകി സേവനമനുഷ്ഠിക്കുന്ന സിന്ധുവിന്റെ ഈ മാതൃകാപരമായ പ്രവർത്തനം ആഗോളതലത്തിൽ മലയാളി നഴ്സിംഗ് സമൂഹത്തിന്റെ കർത്തവ്യബോധത്തിനും സമർപ്പണത്തിനും തിളക്കമേറിയ മറ്റൊരു മാതൃകയായി മാറിയിരിക്കുകയാണ്.
