പാരിസ്: ഫ്രാൻസ്, സ്പെയിൻ ഉൾപ്പെടെയുള്ള യൂറോപ്യൻ രാജ്യങ്ങളിൽ വ്യാപക നാശം വിതച്ച കാട്ടുതീ പല മേഖലകളിലും നിയന്ത്രണവിധേയമാകുന്നതായി അധികൃതർ അറിയിച്ചു. കാലാവസ്ഥ അനുകൂലമായതും അഗ്നിശമന സേനയുടെ വ്യാപക ഇടപെടലും തീ നിയന്ത്രണത്തിലാകാൻ സഹായിച്ചെങ്കിലും പുതിയ ഉഷ്ണതരംഗ സാധ്യത കണക്കിലെടുത്ത് ജാഗ്രത തുടരുകയാണ്.
ഫ്രാൻസിലും സ്പെയിനിലും ആയിരക്കണക്കിന് അഗ്നിശമന സേനാംഗങ്ങളും വിമാനങ്ങളും ഹെലികോപ്റ്ററുകളും ഉപയോഗിച്ചാണ് ദിവസങ്ങളായി രക്ഷാപ്രവർത്തനവും തീ അണയ്ക്കലും നടത്തുന്നത്. തീപിടിത്തത്തെ തുടർന്ന് ഒഴിപ്പിക്കപ്പെട്ട പലർക്കും ചില പ്രദേശങ്ങളിലേക്ക് മടങ്ങാൻ അനുമതി നൽകിയിട്ടുണ്ടെങ്കിലും അപകടസാധ്യത പൂർണമായി ഒഴിഞ്ഞിട്ടില്ലെന്ന് അധികൃതർ വ്യക്തമാക്കി.
യൂറോപ്പ് ലോകത്ത് ഏറ്റവും വേഗത്തിൽ ചൂട് കൂടുന്ന ഭൂഖണ്ഡമാണെന്നും കടുത്ത ചൂടും വരണ്ട കാലാവസ്ഥയും കാട്ടുതീയുടെ വ്യാപനത്തിന് പ്രധാന കാരണമാകുന്നതായും വിദഗ്ധർ ചൂണ്ടിക്കാട്ടുന്നു. വരും ദിവസങ്ങളിൽ വീണ്ടും ഉയർന്ന താപനില അനുഭവപ്പെടാൻ സാധ്യതയുള്ളതിനാൽ പ്രതിരോധ നടപടികൾ ശക്തിപ്പെടുത്താൻ വിവിധ രാജ്യങ്ങൾ തീരുമാനിച്ചിട്ടുണ്ട്.
