തിരുവനന്തപുരം: തിരുവനന്തപുരം റീജണൽ കാൻസർ സെന്ററിൽ (ആർസിസി) വിവിധ തസ്തികകളിലേക്ക് അടിയന്തര നിയമനം നടക്കുന്നുവെന്ന പേരിൽ സമൂഹമാധ്യമങ്ങളിൽ പ്രചരിക്കുന്നത് വ്യാജ പരസ്യമെന്ന് അധികൃതർ. എട്ടാം ക്ലാസ് മുതൽ വിദ്യാഭ്യാസ യോഗ്യതയുള്ളവർക്ക് ആകർഷകമായ ശമ്പളത്തോടെ ജോലി വാഗ്ദാനം ചെയ്തുകൊണ്ടാണ് വ്യാപകമായ പ്രചാരണം നടക്കുന്നത്. ഇത്തരം വാഗ്ദാനങ്ങളുമായി ആർസിസിക്ക് യാതൊരുവിധ ബന്ധവുമില്ലെന്ന് സ്ഥാപനം ഔദ്യോഗികമായി അറിയിച്ചു.
തൊഴിലന്വേഷകരെ കബളിപ്പിക്കുക എന്ന ലക്ഷ്യത്തോടെയാണ് സോഷ്യൽ മീഡിയ പ്ലാറ്റ്ഫോമുകളിൽ ഈ പരസ്യം പ്രചരിക്കുന്നത്. ആർസിസിയിലെ നിയമനങ്ങൾ സർക്കാർ മാനദണ്ഡങ്ങൾ പാലിച്ചും കൃത്യമായ വിജ്ഞാപനത്തിലൂടെയുമാണ് നടക്കാറുള്ളത്. ഔദ്യോഗിക വെബ്സൈറ്റിലോ വിശ്വാസയോഗ്യമായ മാധ്യമങ്ങളിലോ വരുന്ന അറിയിപ്പുകൾ അല്ലാതെ, വാട്സാപ്പ് വഴിയും മറ്റും പ്രചരിക്കുന്ന സന്ദേശങ്ങൾ വിശ്വസിക്കരുതെന്ന് പൊതുജനങ്ങൾക്കും തൊഴിലന്വേഷകർക്കും അധികൃതർ മുന്നറിയിപ്പ് നൽകി.
സമൂഹമാധ്യമങ്ങൾ വഴി പണമോ വ്യക്തിഗത വിവരങ്ങളോ ആവശ്യപ്പെടുന്ന ഇത്തരം സംഘങ്ങളെക്കുറിച്ച് ജാഗ്രത പുലർത്തണമെന്നും വ്യാജ പ്രചാരണങ്ങൾക്കെതിരെ നിയമനടപടികൾ സ്വീകരിക്കുമെന്നും ആർസിസി അറിയിച്ചു. കൂടുതൽ വിവരങ്ങൾക്ക് സ്ഥാപനത്തിന്റെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്
