തിരുവനന്തപുരം: കേരളത്തിന്റെ ദീർഘകാല ഊർജ ആവശ്യങ്ങൾ നിറവേറ്റുന്നതിനായി ഫ്ളോട്ടിങ് സോളാർ പദ്ധതികളുടെയും പമ്പ് സ്റ്റോറേജ് സംവിധാനങ്ങളുടെയും പ്രായോഗികതയും നടപ്പാക്കൽ സാധ്യതകളും ഗൗരവമായി പരിശോധിക്കുമെന്ന് വൈദ്യുതി മന്ത്രി സണ്ണി ജോസഫ്. സംസ്ഥാനത്തിന്റെ ഭൂമിശാസ്ത്രപരവും കാലാവസ്ഥാപരവുമായ പ്രത്യേകതകൾ കണക്കിലെടുത്ത് പുതിയ ഊർജ പദ്ധതികൾ കണ്ടെത്തേണ്ടതുണ്ടെന്നും മന്ത്രി പറഞ്ഞു.
സംസ്ഥാന സർക്കാർ 2026-27 ബജറ്റിൽ പ്രഖ്യാപിച്ച പ്രധാന വികസന പദ്ധതികളുടെ നടത്തിപ്പിനുള്ള റോഡ്മാപ്പ് തയ്യാറാക്കുന്നതിന്റെ ഭാഗമായി സംഘടിപ്പിച്ച ‘റീഇമാജിനിംഗ് കേരള’ റൗണ്ട് ടേബിൾ കോൺഫറൻസിലെ പുനരുപയോഗ ഊർജസ്രോതസുകളെക്കുറിച്ചുള്ള സെഷനിലാണ് മന്ത്രി ഇക്കാര്യം വ്യക്തമാക്കിയത്.
കാലാവസ്ഥാ വ്യതിയാനവും സംസ്ഥാനത്തെ ഭൂമിയുടെ പരിമിതമായ ലഭ്യതയും വലിയ തോതിലുള്ള പരമ്പരാഗത സൗരോർജ, കാറ്റാടി വൈദ്യുതി പദ്ധതികൾ നടപ്പാക്കുന്നതിൽ വെല്ലുവിളിയാണെന്ന് മന്ത്രി ചൂണ്ടിക്കാട്ടി. ഇതിന്റെ പശ്ചാത്തലത്തിൽ ജലാശയങ്ങളിൽ സ്ഥാപിക്കുന്ന ഫ്ളോട്ടിങ് സോളാർ പദ്ധതികൾ, പമ്പ് സ്റ്റോറേജ് സംവിധാനങ്ങൾ, തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ കമ്മ്യൂണിറ്റി തലത്തിലുള്ള ബാറ്ററി സംഭരണ സംവിധാനങ്ങൾ എന്നിവയുടെ സാധ്യത പരിശോധിക്കണമെന്നാണ് സർക്കാരിന്റെ നിലപാട്.
നിലവിലെ ഊർജ പ്രതിസന്ധിക്ക് ഊർജസംരക്ഷണം കൂടുതൽ പ്രായോഗികമായ അടിയന്തര പരിഹാരങ്ങളിലൊന്നാണെന്ന് കെഎസ്ഇബി ചെയർമാനും മാനേജിങ് ഡയറക്ടറുമായ എം.ജി. രാജമാണിക്യം പറഞ്ഞു. ഊർജസംരക്ഷണം സർക്കാർ നയത്തിന്റെ ഭാഗമാക്കണമെന്നും അദ്ദേഹം അഭിപ്രായപ്പെട്ടു. മേൽക്കൂര സോളാർ സംവിധാനങ്ങൾ വ്യാപകമാകുന്ന സാഹചര്യത്തിൽ ഉപഭോക്താക്കളുടെ വൈദ്യുതി ഉപയോഗത്തെക്കുറിച്ച് കൂടുതൽ ബോധവൽക്കരണം ആവശ്യമാണ്.
ഫ്ളോട്ടിങ് സോളാർ പദ്ധതികൾക്ക് കേരളത്തിൽ വലിയ സാധ്യതയുണ്ടെന്ന് വടക്കേ വയനാട്ടിലെ ബാണാസുര സാഗർ റിസർവോയറിലെ ഫ്ളോട്ടിങ് സോളാർ പദ്ധതിയുമായി ബന്ധപ്പെട്ട് പ്രവർത്തിച്ച എം.ആർ. നാരായണൻ പറഞ്ഞു. സംസ്ഥാനത്ത് ഇത്തരം പദ്ധതികളിലൂടെ ഏകദേശം 2,000 മെഗാവാട്ട് വൈദ്യുതി ഉൽപാദിപ്പിക്കാനുള്ള ശേഷിയുണ്ടെന്നാണ് അദ്ദേഹത്തിന്റെ വിലയിരുത്തൽ. പദ്ധതികൾ സമയബന്ധിതമായി നടപ്പാക്കാൻ വിവിധ വകുപ്പുകളുടെ അനുമതികൾ ഏകോപിപ്പിക്കുന്ന സിംഗിൾ വിൻഡോ ക്ലിയറൻസ് സംവിധാനം ഏർപ്പെടുത്തണമെന്നും അദ്ദേഹം നിർദേശിച്ചു.
അതേസമയം, കേരളത്തിൽ ഫ്ളോട്ടിങ് സോളാർ പദ്ധതികൾക്കുള്ള സാധ്യത നേരത്തെ തന്നെ സർക്കാർ തലത്തിൽ പരിശോധിച്ചുവരുന്നതാണ്. 2022 മുതൽ ജലാശയങ്ങൾ, റിസർവോയറുകൾ, കായലുകൾ, ഉപയോഗശൂന്യമായ മറ്റ് ജലാശയങ്ങൾ എന്നിവ പദ്ധതികൾക്കായി പരിഗണിച്ചുവരുന്നുണ്ട്. എന്നാൽ അനുയോജ്യമായ സ്ഥലങ്ങൾ കണ്ടെത്തുന്നതിലും പദ്ധതികൾ നടപ്പാക്കുന്നതിലും ഇതുവരെ മുന്നേറ്റം പരിമിതമാണെന്നാണ് റിപ്പോർട്ടുകൾ.
കേന്ദ്രസർക്കാരും 2026ൽ ഫ്ളോട്ടിങ് സോളാർ പദ്ധതികൾക്ക് ഊർജസംഭരണ സംവിധാനം കൂട്ടിച്ചേർത്ത് നടപ്പാക്കുന്നതിനുള്ള ‘പ്രധാനമന്ത്രി സൂര്യ സരോവർ യോജന’യ്ക്ക് അംഗീകാരം നൽകിയിട്ടുണ്ട്. രാജ്യത്ത് 5,000 മെഗാവാട്ട് ഫ്ളോട്ടിങ് സോളാർ പദ്ധതികൾ വികസിപ്പിക്കുകയാണ് പദ്ധതിയുടെ ലക്ഷ്യം.
