ലഖ്നൗ: ഉത്തർപ്രദേശിലെ മഹത്തായ അടിസ്ഥാനസൗകര്യ പദ്ധതികളിലൊന്നായ ഗംഗ എക്സ്പ്രസ്വേ പ്രധാനമന്ത്രി നരേന്ദ്ര മോദി രാജ്യത്തിന് സമർപ്പിച്ചു. ഹർദോയിൽ നടന്ന ചടങ്ങിലായിരുന്നു ഉദ്ഘാടനം.594 കിലോമീറ്റർ ദൈർഘ്യമുള്ള ഈ എക്സ്പ്രസ്വേ മേരത്ത് മുതൽ പ്രയാഗ്രാജ് വരെ ബന്ധിപ്പിക്കുന്ന രാജ്യത്തിലെ ഏറ്റവും ദൈർഘ്യമേറിയ എക്സ്പ്രസ്വേകളിലൊന്നാണ്.
പദ്ധതി പ്രവർത്തനക്ഷമമായതോടെ മേരത്ത്–പ്രയാഗ്രാജ് യാത്രാസമയം ഏകദേശം ആറു മണിക്കൂറായി കുറയുമെന്ന് വിലയിരുത്തപ്പെടുന്നു. സംസ്ഥാനത്തെ 12 ജില്ലകളെ ബന്ധിപ്പിക്കുന്ന ഈ എക്സ്പ്രസ്വേ ഗതാഗതവും വ്യാപാരവും വേഗത്തിലാക്കുന്നതിൽ നിർണായക പങ്ക് വഹിക്കും.
ഏകദേശം ₹36,000 കോടിയിലധികം ചെലവഴിച്ചാണ് പദ്ധതി നടപ്പാക്കിയിരിക്കുന്നത്. ആധുനിക സൗകര്യങ്ങളോടെ നിർമ്മിച്ച ഈ ഗ്രീൻഫീൽഡ് എക്സ്പ്രസ്വേ സംസ്ഥാനത്തിന്റെ സാമ്പത്തിക വളർച്ചയ്ക്ക് വലിയ ഉണർവ് നൽകുമെന്നാണ് കേന്ദ്രവും സംസ്ഥാനവും വിലയിരുത്തുന്നത്.
ഉദ്ഘാടന പ്രസംഗത്തിൽ ഇത് സംസ്ഥാനത്തിന്റെ വികസനത്തിന് “പുതിയ ലൈഫ്ലൈൻ” ആകുമെന്ന് പ്രധാനമന്ത്രി പറഞ്ഞു. ഭാവിയിൽ ഈ എക്സ്പ്രസ്വേ ഹരിദ്വാർ വരെ നീട്ടാനുള്ള പദ്ധതിയും പ്രഖ്യാപിച്ചു.
