തിരുവനന്തപുരം: സംസ്ഥാന ആരോഗ്യവകുപ്പിൽ മന്ത്രിയും പ്രിൻസിപ്പൽ സെക്രട്ടറിയും തമ്മിലുള്ള ഭിന്നത രൂക്ഷമാകുന്നു. താൻ അടിയന്തര നടപടിക്ക് നിർദേശിച്ച 35 പ്രധാന ഫയലുകൾ പ്രിൻസിപ്പൽ സെക്രട്ടറി ശർമിള മേരി ജോസഫ് മനഃപൂർവം പിടിച്ചുവെച്ചിരിക്കുകയാണെന്ന് ആരോഗ്യമന്ത്രി കെ. മുരളീധരൻ മുഖ്യമന്ത്രി വി.ഡി. സതീശനോട് രേഖാമൂലം പരാതിപ്പെട്ടു.
പ്രിൻസിപ്പൽ സെക്രട്ടറിയുടെ ഇത്തരം നിലപാടുകൾ വകുപ്പിന്റെ സുഗമമായ പ്രവർത്തനത്തെ ബാധിക്കുന്നുവെന്ന് ചൂണ്ടിക്കാട്ടിയ മന്ത്രി, ശർമിള മേരി ജോസഫിനെ ആരോഗ്യവകുപ്പിന്റെ ചുമതലയിൽ നിന്ന് ഉടനടി മാറ്റണമെന്ന ആവശ്യവും മുഖ്യമന്ത്രിക്ക് മുന്നിൽ ഉന്നയിച്ചു. ഉന്നത ഉദ്യോഗസ്ഥയുമായുള്ള തർക്കം സർക്കാരിന്റെ ഭരണതലത്തിലും ആരോഗ്യവകുപ്പിലും വലിയ ചർച്ചകൾക്ക് വഴിവെച്ചിരിക്കുകയാണ്.
