കാഠ്മണ്ഡു: നേപ്പാളിലെ ഡോൾപ ജില്ലയിൽ കനത്ത മഞ്ഞുവീഴ്ചയെ തുടർന്ന് ആറ് ഇന്ത്യൻ വിനോദസഞ്ചാരികൾ കുടുങ്ങി. ഷേയ് ഫോക്സുണ്ടോ ദേശീയോദ്യാനത്തിലെ ഉയർന്ന പ്രദേശത്ത് കുടുങ്ങിയ ഇവരെ രക്ഷപ്പെടുത്താൻ നേപ്പാൾ അധികൃതർ ഹെലികോപ്റ്റർ സഹായത്തോടെ ശ്രമം തുടരുകയാണ്. പ്രതികൂല കാലാവസ്ഥ രക്ഷാപ്രവർത്തനത്തിന് തടസ്സമായിട്ടുണ്ട്.
ശനിയാഴ്ച ഉച്ചയോടെയാണ് വിനോദസഞ്ചാരികൾ മഞ്ഞുവീഴ്ചയിൽ കുടുങ്ങിയത്. ഷേയ് ഫോക്സുണ്ടോ ഗ്രാമസഭയിലെ എട്ടാം വാർഡിലുള്ള ധോ മേഖലയിലായിരുന്നു സംഭവം. കാഠ്മണ്ഡുവിൽനിന്ന് ഏകദേശം 300 കിലോമീറ്റർ വടക്കുപടിഞ്ഞാറായി സ്ഥിതിചെയ്യുന്ന ഈ പ്രദേശത്ത് തുടർച്ചയായ മഞ്ഞുവീഴ്ചയെ തുടർന്ന് യാത്രാമാർഗങ്ങൾ തടസ്സപ്പെട്ടിരിക്കുകയാണ്.
മൗമിത ഹാൽദർ, പിയാലി കോലെ, ജജല ത്രിവേദി കുമാർ, ആദിത്യ സിംഗ, ദിപ്ലിന വിശ്വാസ്, രാജേഷ് ഡെ എന്നിവരാണ് കുടുങ്ങിയ വിനോദസഞ്ചാരികൾ. സംഘത്തിൽ നാല് പുരുഷന്മാരും രണ്ട് സ്ത്രീകളുമാണുള്ളത്.
കാലാവസ്ഥ മോശമായതിനെ തുടർന്ന് ഒക്ടോബർ 29 മുതൽ അപ്പർ ഡോൾപയിലേക്കുള്ള യാത്രയ്ക്ക് പ്രാദേശിക ഭരണകൂടം നിയന്ത്രണം ഏർപ്പെടുത്തിയിരുന്നു. എന്നാൽ മുന്നറിയിപ്പുകൾ അവഗണിച്ച് വിനോദസഞ്ചാരികൾ യാത്ര തുടരുകയായിരുന്നുവെന്നാണ് അധികൃതർ പറയുന്നത്. നേപ്പാളി ഗൈഡിനെയും സുരക്ഷാ ഉദ്യോഗസ്ഥരെയും വിട്ട് സംഘം തടാകമേഖലയിലേക്ക് നീങ്ങിയതായും റിപ്പോർട്ടുകളുണ്ട്.
ശനിയാഴ്ച വൈകുന്നേരം വിനോദസഞ്ചാരികളുമായി ബന്ധം നഷ്ടപ്പെട്ടതിനെ തുടർന്ന് ഗൈഡ് ഡോൾപ ജില്ലാ ഭരണകൂടത്തെ വിവരം അറിയിച്ചു. തുടർന്ന് സുരക്ഷാസേനയെ വിന്യസിക്കുകയും രക്ഷാപ്രവർത്തനത്തിനായി ഹെലികോപ്റ്റർ എത്തിക്കാൻ തീരുമാനിക്കുകയും ചെയ്തു.
എന്നാൽ സുര്‍ഖേത് സൈനിക താവളത്തിൽനിന്ന് പുറപ്പെടേണ്ട നേപ്പാൾ സൈന്യത്തിന്റെ ഹെലികോപ്റ്ററിൽ സാങ്കേതിക തകരാർ കണ്ടെത്തിയതോടെ രക്ഷാപ്രവർത്തനം വൈകി. പിന്നീട് മറ്റൊരു ഹെലികോപ്റ്റർ ഉപയോഗിച്ച് രക്ഷാപ്രവർത്തനം നടത്താനുള്ള ശ്രമങ്ങൾ ആരംഭിച്ചു.
ഞായറാഴ്ച രാവിലെ കുടുങ്ങിയവരുടെ സ്ഥലം അധികൃതർ കണ്ടെത്തിയെങ്കിലും പ്രതികൂല കാലാവസ്ഥ കാരണം ഹെലികോപ്റ്ററിന് അവിടെ ഇറങ്ങാനായില്ല. രക്ഷാപ്രവർത്തനത്തിനായി സ്വകാര്യ വിമാനക്കമ്പനിയായ സിംറിക് എയറിന്റെ ഹെലികോപ്റ്റർ ഉപയോഗിക്കാനുള്ള സാധ്യതയും അധികൃതർ പരിശോധിക്കുന്നുണ്ട്.
നേപ്പാളിലെ ഏറ്റവും ആഴമേറിയ തടാകമായ ഷേയ് ഫോക്സുണ്ടോ സമുദ്രനിരപ്പിൽനിന്ന് ഏകദേശം 3,600 മീറ്റർ ഉയരത്തിലാണ് സ്ഥിതി ചെയ്യുന്നത്. ഹിമാലയൻ മേഖലയിലെ തുടർച്ചയായ മഞ്ഞുവീഴ്ചയും പ്രതികൂല കാലാവസ്ഥയും വിനോദസഞ്ചാരികൾക്കും ട്രെക്കർമാർക്കും അപകടസാധ്യത വർധിപ്പിക്കുന്ന സാഹചര്യത്തിലാണ് സംഭവം.
മലയോര മേഖലകളിൽ യാത്ര ചെയ്യുന്നവർ ഔദ്യോഗിക കാലാവസ്ഥാ മുന്നറിയിപ്പുകൾ പാലിക്കണമെന്നും പ്രതികൂല കാലാവസ്ഥയുള്ള പ്രദേശങ്ങളിലേക്കുള്ള യാത്രകൾ ഒഴിവാക്കണമെന്നും നേപ്പാൾ അധികൃതർ നിർദേശിച്ചു.
