ന്യൂഡൽഹി: ഇന്ത്യയും ഓസ്ട്രേലിയയും തമ്മിലുള്ള പ്രതിരോധ ബന്ധം കൂടുതൽ ശക്തമാക്കുന്നതിന്റെ ഭാഗമായി ഇരുരാജ്യങ്ങളും തമ്മിൽ പുതിയ ധാരണാപത്രം (MoU) ഒപ്പുവെക്കാനൊരുങ്ങുന്നു. പ്രതിരോധ സാമഗ്രികളുടെയും സേവനങ്ങളുടെയും കൈമാറ്റവും ലഭ്യമാക്കലും ഔപചാരികമാക്കുന്നതിനുള്ള നിർണായക ധാരണാപത്രത്തിലാണ് ഇരുരാജ്യങ്ങളും ഒപ്പുവെക്കുന്നത്. കഴിഞ്ഞ ജൂൺ ആദ്യവാരം ന്യൂഡൽഹിയിൽ നടന്ന രണ്ടാമത് ഇന്ത്യ-ഓസ്ട്രേലിയ പ്രതിരോധ മന്ത്രിമാരുടെ ചർച്ചയെ തുടർന്നാണ് ഈ നീക്കം.
ഇരുരാജ്യങ്ങളും തമ്മിലുള്ള പ്രതിരോധ സഹകരണം വിപുലീകരിക്കുന്നതിന്റെ ഭാഗമായി ഇന്ത്യൻ, ഓസ്ട്രേലിയൻ നാവികസേനാ ഉദ്യോഗസ്ഥർ നിലവിൽ ചെന്നൈയിലെ മാരിടൈം റെസ്ക്യൂ കോർഡിനേഷൻ സെന്ററിൽ സംയുക്ത തിരച്ചിൽ, രക്ഷാപ്രവർത്തന ടേബിൾടോപ്പ് അഭ്യാസങ്ങൾ (tabletop exercises) നടത്തിവരികയാണ്. ഇന്ത്യൻ ഓഷ്യൻ റിം അസോസിയേഷന്റെ (IORA) വർക്കിങ് ഗ്രൂപ്പിന്റെ സംയുക്ത നേതൃത്വത്തിലാണ് ഈ അഭ്യാസം നടക്കുന്നത്.
ഇന്ത്യയും ഓസ്ട്രേലിയയും തമ്മിലുള്ള പ്രതിരോധ സഹകരണം ശക്തമാക്കുന്നതിനൊപ്പം, പ്രതിരോധ ഉപകരണങ്ങളുടെ നിർമ്മാണം, അനുബന്ധ സേവനങ്ങൾ എന്നിവയിൽ ഇരുരാജ്യങ്ങളും തമ്മിൽ കൂടുതൽ അടുത്ത സഹകരണം ഉറപ്പാക്കാനും ഈ പുതിയ ധാരണാപത്രം ലക്ഷ്യമിടുന്നു.
