തിരുവനന്തപുരം: സംസ്ഥാനത്ത് ഇൻഫ്ലുവൻസ ബാധിതരുടെയും മരണങ്ങളുടെയും എണ്ണത്തിൽ വലിയ വർധനവ് രേഖപ്പെടുത്തുന്ന പശ്ചാത്തലത്തിൽ പൊതുജനങ്ങൾ അതീവ ജാഗ്രത പുലർത്തണമെന്ന് ആരോഗ്യവകുപ്പിന്റെ മുന്നറിയിപ്പ്. നടപ്പ് മാസം മാത്രം 251 പേർക്ക് രോഗം സ്ഥിരീകരിക്കുകയും 20 പേർ മരണപ്പെടുകയും ചെയ്തു. കഴിഞ്ഞ വർഷം ഇതേ മാസത്തിൽ 724 പേർക്ക് രോഗബാധയുണ്ടായെങ്കിലും നാല് മരണങ്ങൾ മാത്രമാണ് സംഭവിച്ചിരുന്നത്. എന്നാൽ ഈ വർഷം ഇതുവരെയുള്ള കണക്കുകൾ പരിശോധിക്കുമ്പോൾ 11,021 പേർക്ക് ഇൻഫ്ലുവൻസ പിടിപെടുകയും 119 പേർക്ക് ജീവൻ നഷ്ടമാവുകയും ചെയ്തു. കഴിഞ്ഞ വർഷം ആകെ 6,182 കേസുകളും 40 മരണങ്ങളുമാണ് ഉണ്ടായത്. മുൻവർഷത്തെ അപേക്ഷിച്ച് മരണനിരക്കിൽ ഉണ്ടായ വൻ കുതിച്ചുചാട്ടം ആരോഗ്യമേഖലയിൽ കടുത്ത ആശങ്ക സൃഷ്ടിക്കുന്നുണ്ട്.
പനി, ശരീരവേദന, ജലദോഷം തുടങ്ങിയ ശാരീരിക ബുദ്ധിമുട്ടുകൾ നിസ്സാരമായി കാണരുതെന്നും പ്രാരംഭ ലക്ഷണങ്ങൾ പ്രകടമാകുമ്പോൾത്തന്നെ വൈദ്യസഹായം തേടണമെന്നും ആരോഗ്യവിഭാഗം ഓർമ്മിപ്പിച്ചു. യാതൊരു കാരണവശാലും സ്വയംചികിത്സയ്ക്ക് മുതിരരുത്. രോഗബാധിതർ മതിയായ വിശ്രമം ഉറപ്പാക്കുകയും ധാരാളം വെള്ളം കുടിക്കുകയും വേണം. അണുബാധ പടരാതിരിക്കാൻ മാസ്ക് ധരിക്കാൻ ശ്രദ്ധിക്കണം. രോഗപ്രതിരോധ ശേഷി കുറഞ്ഞവരും പ്രായമായവരും കുട്ടികളും കൂടുതൽ മുൻകരുതലുകൾ എടുക്കണം. പനിയുള്ള കുട്ടികളെ ഒരു കാരണവശാലും വിദ്യാലയങ്ങളിലേക്ക് അയക്കരുതെന്നും നിർദേശമുണ്ട്.
ഇൻഫ്ലുവൻസയ്ക്കൊപ്പം ഡെങ്കിപ്പനി വ്യാപനത്തിനെതിരെയും പ്രതിരോധം കടുപ്പിക്കാൻ അധികൃതർ ആവശ്യപ്പെട്ടു. ഇടവിട്ട് പെയ്യുന്ന മഴ ഈഡിസ് കൊതുകുകൾ പെരുകാൻ കാരണമാകുന്നതിനാൽ വാസസ്ഥലങ്ങളിലും തൊഴിലിടങ്ങളിലും വെള്ളക്കെട്ടുകൾ ഉണ്ടാകാൻ അനുവദിക്കരുത്. കൊതുകിന്റെ ഉറവിടങ്ങൾ കണ്ടെത്തി നശിപ്പിക്കുന്നതിനൊപ്പം ഡ്രൈ ഡേ കൃത്യതയോടെ ആചരിക്കണം. സ്കൂളുകളിൽ വെള്ളിയാഴ്ചയും സ്ഥാപനങ്ങളിൽ ശനിയാഴ്ചയും വീടുകളിൽ ഞായറാഴ്ചയുമാണ് ഡ്രൈ ഡേ പാലിക്കേണ്ടത്.
റഫ്രിജറേറ്ററിന് പിന്നിലെ ട്രേ, ചെടിച്ചട്ടികളുടെ അടിയിലെ പാത്രങ്ങൾ, ഇൻഡോർ ചെടികൾ, ഉപയോഗശൂന്യമായ ക്ലോസറ്റുകൾ, ടെറസ്, സൺഷേഡ്, പാത്തികൾ എന്നിവിടങ്ങളിൽ വെള്ളം തങ്ങിനിൽക്കുന്നത് തടയണം. ചിരട്ടകൾ, പാഴ്ക്കുപ്പികൾ, മറ്റ് ഉപയോഗശൂന്യ വസ്തുക്കൾ എന്നിവ അലക്ഷ്യമായി വലിച്ചെറിയാതെ സംസ്കരിക്കണം. ജലം സംഭരിക്കുന്ന പാത്രങ്ങളും ടാങ്കുകളും വായുസഞ്ചാരമില്ലാതെ അടച്ചുസൂക്ഷിക്കണം. കൊതുകുകടിയേൽക്കാതിരിക്കാൻ സ്വയം പ്രതിരോധ മാർഗ്ഗങ്ങൾ ഉപയോഗിക്കണം. മുൻപ് ഡെങ്കിപ്പനി വന്നിട്ടുള്ളവർക്ക് വീണ്ടും അണുബാധയുണ്ടായാൽ അത് അതീവ ഗുരുതരമാകാൻ സാധ്യതയുള്ളതിനാൽ കൂടുതൽ കരുതൽ ആവശ്യമാണ്. ലക്ഷണങ്ങൾ അവഗണിക്കാതെ യഥാസമയം ചികിത്സ ലഭ്യമാക്കാനും കൊതുക് നശീകരണ യജ്ഞങ്ങളിൽ സജീവമായി പങ്കുചേരാനും ആരോഗ്യവകുപ്പ് ജനങ്ങളോട് ആവശ്യപ്പെട്ടു.
