കാൻബറ: സ്വകാര്യ ആശുപത്രി ഇൻഷുറൻസ് പരിരക്ഷയില്ലാത്ത ഉയർന്ന വരുമാനക്കാരായ ഓസ്ട്രേലിയക്കാർക്ക് അധിക നികുതി ഭാരം ഏർപ്പെടുത്താൻ സ്വകാര്യ ആരോഗ്യ ഇൻഷുറൻസ് മേഖലയിൽ നിന്ന് വിവാദ നിർദ്ദേശം. ഉയർന്ന വരുമാനമുള്ളവർക്ക് ഈടാക്കുന്ന മെഡികെയർ ലെവി സർചാർജ് നിലവിലെ 1.5 ശതമാനത്തിൽ നിന്ന് 3 ശതമാനമായി ഇരട്ടിയാക്കണമെന്നാണ് ഇൻഷുറൻസ് മേഖല മുന്നോട്ടുവെച്ചിട്ടുള്ളത്.
ഈ നിർദ്ദേശം നടപ്പിലായാൽ നിലവിലെ ഉയർന്ന നികുതി നിരക്കായ 45 ശതമാനവും 2 ശതമാനം മെഡികെയർ ലെവിയും 3 ശതമാനം സർചാർജും ചേർന്ന് രാജ്യത്തെ ഏറ്റവും ഉയർന്ന ഫലപ്രദമായ നികുതി നിരക്ക് 50 ശതമാനമായി ഉയരും.
നിർദ്ദേശ പ്രകാരം ഓരോ വിഭാഗക്കാർക്കും പ്രതിവർഷം വരുന്ന അധിക ബാധ്യത ഇപ്രകാരമാണ്:
1,20,000 ഡോളർ വാർഷിക വരുമാനമുള്ള അവിവാഹിതർക്ക് പ്രതിവർഷം 600 ഡോളർ അധികമായി നൽകേണ്ടിവരും.
1,50,000 ഡോളർ വരുമാനമുള്ളവർക്ക് 2,655 ഡോളറും, 1,80,000 ഡോളറോ അതിൽ കൂടുതലോ വരുമാനമുള്ളവർക്ക് 2,700 ഡോളറും അധിക ഭാരം വരും.
രണ്ട് കുട്ടികളുള്ള കുടുംബങ്ങളിൽ 2,20,000 ഡോളർ വരുമാനമുള്ളവർക്ക് 1,100 ഡോളറും, 2,80,000 ഡോളർ വരുമാനമുള്ളവർക്ക് 4,900 ഡോളറും, 3,50,000 ഡോളർ വരുമാനമുള്ളവർക്ക് 5,250 ഡോളറുമാണ് അധിക ചിലവ് കണക്കാക്കുന്നത്.
പ്രായമായ പൗരന്മാർക്കുള്ള ഇൻഷുറൻസ് റിബേറ്റുകളിൽ സർക്കാർ വരുത്തുന്ന വെട്ടിക്കുറയ്ക്കലുകൾക്ക് ബദലായാണ് ഈ നിർദ്ദേശം മുന്നോട്ടുവെച്ചിരിക്കുന്നത്. ഇതിലൂടെ പ്രതിവർഷം 483 മില്യൺ ഡോളർ സമാഹരിക്കാനാകുമെന്നാണ് കണക്കുകൂട്ടൽ. അതേസമയം, ഇത് ഇൻഷുറൻസ് മേഖലയുടെ നിർദ്ദേശം മാത്രമാണെന്നും സർക്കാരിന്റെ ഔദ്യോഗിക നയമായി പ്രഖ്യാപിച്ചിട്ടില്ലെന്നും അധികൃതർ വ്യക്തമാക്കുന്നു
