വാഷിങ്ടൺ: മാസങ്ങളായി യു.എസ്. മധ്യസ്ഥതയിൽ നടന്ന ചർച്ചകൾക്ക് പിന്നാലെ ഇസ്രായേലും ലെബനനും പ്രാഥമിക സമാധാന-സുരക്ഷാ ചട്ടക്കൂട് കരാറിൽ ഒപ്പുവച്ചു. അതിർത്തിയിലെ സംഘർഷം അവസാനിപ്പിക്കുന്നതിനും തെക്കൻ ലെബനനിൽ ഘട്ടംഘട്ടമായി ലെബനീസ് സൈന്യത്തിന്റെ നിയന്ത്രണം ഉറപ്പാക്കുന്നതിനുമുള്ള വ്യവസ്ഥകളാണ് കരാറിലുള്ളത്. എന്നാൽ ഹിസ്ബുള്ളയെ നിരായുധമാക്കണമെന്ന വ്യവസ്ഥ സംഘടന ശക്തമായി തള്ളിക്കളഞ്ഞതോടെ കരാർ നടപ്പാകുമോ എന്ന കാര്യത്തിൽ അനിശ്ചിതത്വം തുടരുകയാണ്.
കരാർ പ്രകാരം, നിശ്ചിത മേഖലകളിൽ നിന്ന് ഇസ്രായേൽ സൈന്യം ഘട്ടംഘട്ടമായി പിന്മാറുകയും അവിടങ്ങളിൽ ലെബനീസ് സൈന്യം വിന്യസിക്കുകയും ചെയ്യും. അതേസമയം, ഹിസ്ബുള്ള പൂർണമായും നിരായുധമാകുന്നതുവരെ തെക്കൻ ലെബനനിലെ ചില സുരക്ഷാ മേഖലകളിൽ ഇസ്രായേൽ സൈനിക സാന്നിധ്യം തുടരുമെന്ന് ഇസ്രായേൽ പ്രധാനമന്ത്രി വ്യക്തമാക്കി.
ഹിസ്ബുള്ള ഉപനേതാവ് നയീം ഖാസിം കരാറിനെ “ലെബനന്റെ പരമാധികാരത്തിന് വിരുദ്ധമായ കീഴടങ്ങൽ” എന്ന് വിശേഷിപ്പിച്ച് ഇത് അംഗീകരിക്കില്ലെന്ന് പ്രഖ്യാപിച്ചു. ഇസ്രായേൽ പൂർണമായി പിന്മാറുന്നതുവരെ സായുധ പ്രതിരോധം തുടരുമെന്നും അദ്ദേഹം വ്യക്തമാക്കി. സംഘടനയുടെ നിലപാടിനെ അമൽ പ്രസ്ഥാനവും പിന്തുണച്ചിട്ടുണ്ട്.
കരാറിൽ മാനുഷിക സഹായം, സുരക്ഷാ ഏകോപനം, അതിർത്തി സ്ഥിരത എന്നിവയ്ക്കുള്ള വ്യവസ്ഥകളും ഉൾപ്പെട്ടിട്ടുണ്ട്. എന്നാൽ കരാർ ഒപ്പുവെച്ചതിന് ശേഷവും തെക്കൻ ലെബനനിൽ ഇസ്രായേൽ ഡ്രോൺ ആക്രമണം റിപ്പോർട്ട് ചെയ്തതോടെ സമാധാന ശ്രമങ്ങളുടെ ഭാവിയെക്കുറിച്ചുള്ള ആശങ്കകൾ ശക്തമായിട്ടുണ്ട്.
