തെൽ അവീവ്: കോ-പൈലറ്റിന്റെ ഭീകരാക്രമണ ശ്രമത്തെ ജീവൻ പണയം വെച്ച് ചെറുത്ത് 172 യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ഛാറിന് ഇസ്രായേലിന്റെ പരമോന്നത സിവിലിയൻ ധീരതാ പുരസ്കാരം. ഇസ്രായേൽ പ്രസിഡന്റ് ഐസക് ഹെർസോഗ് ആണ് ‘പ്രസിഡൻഷ്യൽ അവാർഡ് ഫോർ സിവിലിയൻ ഹീറോയിസം’ (Presidential Award for Civilian Heroism) പ്രഖ്യാപിച്ചത്.
ദുബായിൽ നിന്ന് തെൽ അവീവിലേക്ക് പറന്ന ഫ്ലൈ ദുബായ് (FZ1073) വിമാനത്തിൽ വെച്ചായിരുന്നു സംഭവം. വിമാനത്തിന്റെ നിയന്ത്രണം പിടിച്ചെടുത്ത് തെൽ അവീവിലെ ജനവാസ മേഖലയിലുള്ള വൻ കെട്ടിടത്തിലേക്ക് ഇടിച്ചുകയറ്റാൻ പദ്ധതിയിട്ട സഹപൈലറ്റ് ഹമ്മാം അൽ ഹമ്മാമി കോക്പിറ്റിൽ വെച്ച് ക്യാപ്റ്റൻ സ്മിത്തിനെ ക്രൂരമായി കുത്തിപ്പരിക്കേൽപ്പിച്ചു. ചോരയിൽ കുളിച്ചു കിടക്കുമ്പോഴും തോറ്റുകൊടുക്കാതെ ക്യാപ്റ്റൻ സ്മിത് മനസ്സാന്നിധ്യത്തോടെ കോക്പിറ്റിന്റെ വാതിൽ തുറന്നുകൊടുക്കുകയായിരുന്നു.
തുടർന്ന് ക്യാബിനിലുണ്ടായിരുന്ന ഇസ്രായേലി യാത്രക്കാരും ജീവനക്കാരും ചേർന്ന് അക്രമിയെ കീഴ്പ്പെടുത്തി. തുടർന്ന് വിമാനം സൗദി അറേബ്യയിലെ തബൂക്കിൽ സുരക്ഷിതമായി അടിയന്തര ലാൻഡിംഗ് നടത്തി വൻ ദുരന്തം ഒഴിവാക്കി. അസാമാന്യ ധീരതയിലൂടെ ദുരന്തമൊഴിവാക്കിയ ഇന്ത്യൻ പൈലറ്റിന് ലോകമെമ്പാടുനിന്നും വലിയ പ്രശംസയാണ് ലഭിക്കുന്നത്.
