കൊച്ചി: ഇന്ത്യൻ സൂപ്പർ ലീഗിന്റെ (ഐഎസ്എൽ) 13-ാം സീസണിലെ ആദ്യ മത്സരത്തിനായി കേരള ബ്ലാസ്റ്റേഴ്‌സ് ഇന്ന് കളത്തിലിറങ്ങും. വൈകിട്ട് അഞ്ചിന് നടക്കുന്ന മത്സരത്തിൽ ഇന്റർ കാശിയാണ് എതിരാളികൾ. പുതിയ ഉടമകൾ എത്തിയതോടെ കൂടുതൽ വിദേശ താരങ്ങളെ ടീമിലെത്തിച്ച ബ്ലാസ്റ്റേഴ്‌സ് പുതിയ സീസണിൽ മികച്ച തുടക്കമാണ് ലക്ഷ്യമിടുന്നത്.
ക്യാപ്റ്റൻ അഡ്രിയാൻ ലൂണ തന്നെയാണ് ടീമിന്റെ പ്രധാന താരവും ആരാധകരുടെ പ്രതീക്ഷയും. ഏകദേശം 22 കോടി രൂപ ചെലവഴിച്ച് ടീമിനെ ശക്തിപ്പെടുത്തി പുതിയ തുടക്കത്തിനാണ് ബ്ലാസ്റ്റേഴ്‌സ് ശ്രമിക്കുന്നത്. പരിശീലകൻ ആഷ്‌ലി വെസ്റ്റ്‌വുഡിന്റെ കീഴിൽ ടീം മികച്ച പ്രകടനം പുറത്തെടുക്കുമെന്ന പ്രതീക്ഷയിലാണ് ആരാധകർ.
കഴിഞ്ഞ സീസണിലെ പ്രതിസന്ധികളും അനിശ്ചിതത്വങ്ങളും ഒഴിവാക്കി പുതിയ സീസണിൽ മുന്നേറാനാണ് ക്ലബ്ബിന്റെ ശ്രമം. നിരാശരായ ആരാധകരെ തിരിച്ചുകൊണ്ടുവരാൻ മികച്ച പ്രകടനം അനിവാര്യമാണ്. ആദ്യ മത്സരത്തിലെ വിജയം സീസണിൽ ടീമിന്റെ ആത്മവിശ്വാസം വർധിപ്പിക്കുമെന്ന പ്രതീക്ഷയിലാണ് ആരാധകർ.
